USA ka dinner fellowship nga ginganlan og ‘A Journey to a Plastic Ocean’ ang gipasiugdahan sa grupo nga Oceana nga kabahin sa ilang pagkabana alang sa kadagatan nga luwas sa polyusyon ug plastik nga basura.
Ang maong dinner fellowship gipahigayon niadtong Martes, Nobiyembre 5, sa Cebu Parklane International Hotel sa siyudad sa Sugbo.
Usa ka organisasyon ang Oceana nga dunay adbokasiya sa pag-impluwensiya sa mga polisiya sa nagkalainlain nga mga nasud nga mandoan ug bantayan ang ilang kadagatan.
Adunay 17.6 ka bilyon ka timbang nga plastik nga gipanglabay sa mga kadagatan matag tuig ug kini maka apekto sa mga mananap sa dagat sama sa mga bao, balyena, ug uban pa.
Ang maong kalihokan naghisgot sa konserba sa atong mga kadagatan ug himuon kini nga luwas sa mga plastic. Giimbitar ang nagkalain-lain nga mga hingtungdan aron pagpaambit sa ilang mga talan-awon ug ilang mga kaagi sa pag-atiman sa kalibutan ngadto sa paggamit og plastik.
Usa si Kimokeo Kapahulehua, usa ka Hawaii-based nga paddler sa ilang mga espesyal nga bisita nga mopasabot sa iyang mga ideya ug adbokasiya sa pag-atiman sa kadagatan.
Si Atty. Gloria Estanzo-Ramos, bise presidente sa Oceana, niingon nga kini ang ilang gilusad nga kampanya batok sa paggamit og plastik. Nakadawat usab siya og bangka nga ginama sa kahoy gikan sa kapahulehua.
“We are focused on solid waste management. We are looking at banning of using single use of plastics and to be consider as part of the list of the non-environmental acceptable products or packaging in the country which is under of the RA 9003 should be ban,” saysay niya.
Lakip sa mga dumadapit mao ang mga NGO, Philippine Navy, business sectors, kabatan-onan, ang simbahan, ug ang gobiyerno sa mga nipaambit sa ilang mga aksyon aron paghimo sa kalibutan ug sa mga kadagatan luwas sa mga plastik. (JCT)