WALA nagpatay-og si Miguel Gastador sa mga langyaw niyang kaparang sa linayatay ug iyang gibawi ang slamdunk title sa Cebu Schools Athletic Foundation Inc. (CESAFI) All-Star Games kagahapon sa Cebu Coliseum.
Sukwahi sa gilauman, ang pambato sa University of San Jose Recoletos (USJ-R) Jaguars wala kaayo nakasugat og hugot nga kompetisyon batok sa upat ka imports nga iyang mga kaparang.
Sa elimination round, si Gastador, kinsa maoy Slamdunk King niadtong 2017, nakahakot og kinatibuk-ang 45 puntos gikan sa lima ka judges nga maoy nagtukmod kaniya sa final round.
Ang kontra ni Gastador sa final round mao si Southwestern University (SWU)-Phinma Cobras import Lamine Thiam, kinsa nakahakot sab og 45 puntos sa elimination round.
Ang ubang mga partisipante mao ang imports nga sila si Sameen Swint sa University of Southern Philippines Foundation’s (USPF), Sommy Managor sa University of San Carlos (USC) Warriors ug Lass Coulinaly sa University of the Visayas (UV) Green Lancers.
Sa final round, si Thiam nasipyat pagpasulod sa bola sa duha niya ka mga pagsuway hinungdan nga igo ra kining nakakuha sa labing ubos nga puntos nga 25.
Ning higayuna, wala na kaayo’y pressure si Gastador ug ang simple niyang hansak nga nakahakot lang og 37 puntos igo na aron maangkon niya pagbalik ang slamdunk title.
Bisan segurado na siyang makampiyon, gilingaw lang gihapon ni Gastador ang mga tumatan-aw pinaagi sa usa ka eksplosibong hansak diin gipunit niya ang bola gikan sa nag-isa nga kamot ni Coulinaly una niya gihansak ang bola.
“Challenging kaayo ni para nako kay sila (imports) ang akong mga kontra. Nisalig lang gyud ko sa Ginuo,” matod ni Gastador.
“Daghan pa man unta ko og mapakita kon nindot pa ang rules. Lain man gud ang rules kay kon masipyat ka, lisod na imong chance. Maong sa final round, naneguro na lang ko nga masulod nako ang dunk.”
Sa kulbahinam nga three-point shootout, naghari Paul Galinato sa University of Cebu (UC) Webmasters.
Human sa duha ka elimination rounds, nahilakip si Galinato sa lima nga nakasulod sa final round.
Sa final round, nagtabla sila ni Magic Marata sa USC sa ibabaw nga bahin nga parehong nakakuha og 12 puntos nga maoy nakapugos og knockout match.
Sa knockout match, gilupig ni Galinato si Mararta, 15-13.
Samtang All-Star Game sa high school division, gipanglubong sa Team A ang Team B, 102-83. Sa presstime, nagpadayon pa ang All-Star Game sa college division.
Puntos matag usa:
Team A High School (102) - Ochavo 18, Guibao 17, Casinillo 16, Isabelo 11, Escobido 6, Jalalon 5, Sacayan 4, Booc 2, Co 2, Villanueva 1. Team B High School (83) - Abarquez 21, Dizon 17, Gaviola 10, Tagalog 8, Melicor 8, Tirol 7, Atilano 4, Go 4, Baruc 2, Escobido 2. (ESL)