Estatuwa sa Divine Mercy tukuron

CEBU. Gikatakda nga tukoron ang pinakadako nga istraktura sa Sugbo, ang Divine Mercy, sa bukirang dapit sa Barangay Garing, lungsod sa Consolacion. (Tampo nga hulagway)
CEBU. Gikatakda nga tukoron ang pinakadako nga istraktura sa Sugbo, ang Divine Mercy, sa bukirang dapit sa Barangay Garing, lungsod sa Consolacion. (Tampo nga hulagway)

GIKATAKDA nga tukuron ang pinakadaku unya nga straktura sa Sugbo, ang Divine Mercy sa bukirang dapit sa Barangay Garing, lungsod sa Consolacion.

Diin usa na unya kini sa mamahimo nga landmark sa Cebu ug simbolo sa dakung pagtuo sa mga Sugbuanon ngadto sa Ginoo.

Giplanuhan nga kasugdan na sa pagpahimo ang 130 ka tiil nga statuwa sa Divine Mercy, Enero sa sunod tuig, kini human nga gidonar sa pamilya ni kanhi Consolacion mayor Avelino Gungob Sr. ang ilang unom ka ektaryang luna, diha sa barangay Garing.

Diin gawas sa mga pulong nga kanunay nga ilitok isip pag-ampo ngadto sa Divine Mercy, nga mao ang ‘Jesus I trust in You!’, ikulit usab unya sa ubos sa maong statuwa, nga kini ang ‘the Light of the World’.

Sa gipatawag nga pressconference Lunes sa buntag, Nobyembre 11, sa mga sakop sa Shrine of The Divine Mercy de Cebu Foundation, Inc. (SDMCF), uban na ni Cebu Archbishop Jose Palma, gitug-an nga gitinguha nila nga mahuman kini ug mamahimo na maduaw sa mga matuohon, sa 2021.

Nga dungan usab sa pagsaulog sa nasud sa ika-500 ka tuig sa kristyanismo, nga unang gidala sa Sugbo.

Ang SDMCF ang naningkamot aron kasugdan ang pagpatukod, diin sa mga mosunod nga tuig, giplanuhan usab nga makita dinhi ang kalabot sa mga estorya nga anaa sa bibliya.

Gitug-an ni Fr. Brian Brigoli usa sa mga nitabang alang sa katukuran nga gi-finalize pa nila ang plano, ug dili pa hingpit nga masuta kon pila ang gikinahanglan nga budget.

Apan nagpadayon na sa pagdawat og mga hinabang, sama na lang gikan sa mga deboto sa Divine Mercy.

Matud ni Archbishop Palma nga usa lang kini sa mga archdiocesan project, diin iyang gikalipay ug gihimug-atan nga insakto kay 1521 ang imahe sa balaang batang Hesus ang niabot sa Sugbo, ug sa 2021, mapakita nila sa tanan ang paglambo sa pagtuo, ug simbolo niini ang dakung straktura sa Divine Mercy.

“To me, today is an official proclamation to the world nga dayon na gyud dinhi ang Divine Mercy, and we own the project, because we love the Lord, because we believe, ilabi na sa Cebu, that we have been blessed and we have been loved,” saysay ni Palma.

Kon hingpit na unya kini nga matukod, kini na ang ikatulo nga dakong’ statuwa sa Divine Mercy sa nasud, una sa Bulacan sa Luzon area, ug ang ikaduha ang makita sa Cagayan de Oro sa Mindanao.

Si Gungob ang nipasabot nga tungod sa iyang praktikal nga pagtuo sa kahitas-an ang nakapatuklod kaniya nga ihatag ang unom-ektarya nga luna sa ilang pamilya alang sa maong katuyuan.

Gibendisyonan ni Palma kagahapon sa buntag, Lunes, Nobiyembre 11, ang mga nangulo sa sa SDMFC dungan sa paglusad sa ilang logo sa Divine Mercy Foundation. (FMD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph