NANGAYO og pagsabot apan dili pa makatugot si Misamis Oriental Governor Bambi Emano nga walaon ang pag-ban sa mga processed meat nga makasulod sa lalawigan sa Misamis Oriental.
Kini kay giprotektahan sa gobernador nga masudlan ang lalawigan sa sakit sa baboy nga African Swine Fever (ASF).
Nagpadala og sulat ang Philippine Association of Meat Processors Association Inc. (Pampi) ngadto sa gobernador nga unta hatagan og konsiderasyon ang kamandoan niini nga dili apilon ang processed foods sa pag-ban ug mohatag og specific nga prudokto ang gobernador sa dili angayan pasudlon sa lalawigan.
Gipasabot sa grupo nga sagad sa processed meat products ang giluto sa minimum sa 70 degrees Celsius ug di molapas sa 121 degrees Celsius nagpasabot nga tanang harmful nga bacteria o kagaw lakip ang ASF ang napatay na ang kagaw.
Ang sulat nga nadawat sa buhatan sa niagi lamang semana nihangyo sa gobernador dili lang ilakip ang mga processed foods.
Pipila lamang sa mga miyembro sa Pampi ang mga dagkong kompanya sa mga processed foods sama sa Virgina Food Inc., Sunpride Foods Inc., Jaka Foods Processing Corporation, Euro Swiss Food Inc., Jollibee Corporation, Pampanga's Best, Southern Processing Corporation, ug uban pa.
Pinirmahan kini sa Board of Directors sa asosasyon labina sa presidente nga si Felix Tiukinhoy Jr. sa Virgina Foods Inc.
Matud ni Dr. Benjamin Resma, ang provincial veterinary officer, nga hugot nga gibarogan sa gobernador ang direktiba ug wala pa gihapon kini plano nga walaon karon panahona.
"Nag-storya mi ni governor. Ingon niya nga dili pa kay atong mga raisers dili gyod," matud ni Resma.
Niingon pud siya nga dili bout ni Emano nga masudlan og makapatay nga sakit sa baboy ang lalawigan.
Dugang ni Resma nga luwas ang lalawigan karon panahona ug dili pa mahimong walaon ang pag-ban tungod kay bout nilang luwas ang mga baboy.
"Dili ta mabalaka sa atong mga baboy kay luwas man. Ang atong mabalak ang kana gyod mga processed foods nga sekretong makasulod kay basin mao na magsinugdan," matud ni Resma.
Nasabtan daw matud pa ni Emano ang hangyo sa mga meat processor labina dako kini nga kawalan sa ilang prudokto, apan daw gikinahanglan sab nga protektahan ang lalawigan batok niini nga sakit.