HADLOK nga biyaan sa asawa ang usa sa mga rason sa kanhi branch manager sa Palawan Pawnshop hinungdan nga iyang gilungkab ang maong patigayon ug gilimas ang dakong kantidad niadtong Sabado, Nobiyembre 9, mga alas 10:30 sa gabii sa Vamenta Blvd., Carmen, dakbayan sa Cagayan de Oro.
Ang suspetsado nailang si John Paul Cruz, 26, minyo ug residente sa Westgate Subdivision, Barangay Lumbia.
Sa nahipos nga impormasiyon gikan sa kapulisan sa Police Station (PS) 4, giingong gilimas ni Cruz ang P580,000 ug mga alahas nga nagkantidad og P8 milyones.
Gibutyag ni Police Major Evan Viñas, tigpamaba sa Cagayan de Oro Police Office (Cocpo), nga rason sa suspek nga hadlok kini biyaan sa iyang asawa rason nga nahimo ang maong pagpangawat.
Giingong hadlok kini nga molarga sa gawas sa nasud ang iyang asawa.
"Hadlok siya biyaan sa iyang asawa matud pa niya," matud ni Viñas.
Gidugang pa niini nga nag-inusara lang kini nga nilimas sa maong patigayon ilabi na nga sweto kini sa tanan.
Gibutyag usab ni Police Senior Master Sargent Jason Landar, imbestigador sa PS4 sa Carmen, nga si Cruz ang person of interest tungod kay kini ang nasayod sa tanan sa wala pa kini ma-terminate ug nakitang walay pugsanon nga pagsulod sa maong patigayon ug gikuha pa ang CCTV DVR.
Na-terminate kini human naka dispalko og anaa sa P30,000.
Atol usab sa panghitabo wala ang mga trabahante nga stay-in tungod kay nag-insayo alang sa ilang Christmas party.
"Kani si John Paul sa wala pa na terminate, siya gyud ang in charge sa Vamenta branch nga Palawan pawnshop. Siya gyud ang nakabalo sa vault nga kandado. Kay kung tan-awon nimo ang vault sa area, maglisod gyud ka og abli ug siya pud nakabalo sa alarm system," matud ni Landar.
Samtang wala na maghatag pa og pahayag ang suspek.
Nasayran nga walay nakitang "forced entry" o pugsanon nga pagsulod sa maong patigayon tungod kay nigamit og ATM card ang suspek aron pagbukas sa main door.
Gidala pa sa suspek ang CCTV DVR o recorder sa Closed Circuit Television (CCTV) camera.
Narekober gikan kang Cruz ang P319,300 tungod kay sumala sa suspek iyang gihatag sa habal-habal driver nga tulo ka bandol nga salaping cash samtang ang mga alahas ang narekober.
Nagtingkagol na si Cruz sa bilanggoan alang sa tukmang kaso nga ipasaka batok kaniya.