GIINGONG duha ka adlaw nga nawad-an og tubig ang Barangay Mambuaya nga giingong tungod sa nasinatiang linog niadtong nilabay nga bulan sa dakbayan sa Cagayan de Oro.
Gipasalamatan ni Teodoro Sabugaa, ang city ddministrator, ang City Disaster Risk Reduction Management Office (CDRRMO) human usab daling niresponde sa panginahanglanon sa maong barangay.
"Pasalamat ta sa CDR for responding kay naay problema nato karon sa Mambuaya kay tungod sa linog ang ilang source of water ambot naunsa nga namala, problema biya, lisod kaayo," matud ni Sabuga-a.
Gidugang pa niya nga nakasinati sa pagkawala sa tubig ang mga residente ug gituohang tungod kini sa linog.
"Naay feedback nga katong ilang source sa water nila probably naapektohan sa linog. Mao tong nanginahanglan sila og support para sa tubig. Mao na atong CDR gapaningkamot nga maka-supply," matud ni Sabuga-a.
Gibutyag usab niini nga kinahanglan na nga tabangan ang Cagayan de Oro City Water District (Cowd) ilabi na sa gisugyot ni Mayor Oscar Moreno nga pagpahulam og kantidad aron matabangan kini nga maayo na ang ilang pasilidad alang sa kaayohan sa tanan ilabi na sa panginahanglanon sa tubig.
Samtang gibutyag usab ni Nick Jabagat, ulo sa CDRRMO, nga ikaduha sila naghatag og tubig ngadto sa mga residente ug gani gahapon nibalik na usab og padayon nga gahatag og tubig sa mga lumulupyo sa maong dapit.
"Kagahapon, kaduha and karon pud ongoing sila karon didto again," matud ni Jabagat.
Gipangitaan na usab kini og pamaagi karong panahona nga mabalik na sa hingpit ang ilang tinubdan sa tubig.
"Ang OBO pud nag-follow up para maayo ila water source ma'am," dugang pa.