NAALARMA si Misamis Oriental Governor Bambi Emano sa taas nga fecal coliform content sa Cagayan de Oro River ug kasikbit nga barangay nga basin unya maoy hinungdan makuha ang sakit nga polio.
Kini human nabati ang pamahayag ni Dr. Ian Christian Gonzales, Infectious Diseases Cluster head sa Department of Health-Northern Mindanao, nga ang sakit nga polio posibleng makuha gikan sa kasubaan ug kadagatan nga taas ug fecal coliform content ug mutakboy kini pinaagi sa oral transmittal kon dunay polio victim nga mupabuhagay sa iyang hugaw sa kasapaan, kasubaan ug kadagatan.
Gikumpirmar sab sa Environment Management Board ang report nga taas ang level sa fecal coliform sa Cagayan de Oro River lakip ang kadagatan sa Barangay Bonbon, sa dakyaban sa Cagayan de Oro.
Matud ni Emano, dili tiaw kini nga sitwasyon ug dugang niini nga sa dili pa mopadayag mga mobalik og dagan sa pagka gobernador sa lalawigan sa Misamis Oriental si Cagayan de Oro Mayor Oscar Moreno, atimananon unta niini kini nga problema.
"Kataw-anan kaayo kay sa dihang si Moreno mipadayag nga mubalik ug dagan pagka gobernador, siya miingon nga luoy ang probinsya kay wala maatiman. Ambot ug giunsa ni Moreno ug sa iyang mga opisyal pag-atiman ang Cagayan de Oro River nga nagkatag ang grabeng hugaw nga mi resulta sa taas nga fecal coliform content," pahayag ni Emano.
Sa kabalaka ni Emano nga basin moabot sa mga kabaybayonan sa kalungsoran, hugot nga gimando niini sa mga mayor sa kalungsoran nga pakusgan ang pagpanalipod sa kinaiyahan pinaagi sa hugot nga pagpatuman sa tanang environmental laws sama sa Watershed protection, Clean water Act, Republic Act 9003 kon Solid Waste Management Act, ug ang Health and Sanitation Ordinance.
Dugang niini nga kinahanglan ang tanan nga magtinabangay.
"Giaghat ko ang mga mayor sa lalawigan nga ipatuman ang unod ug pwersa sa balaud, ug mahimo ipatuman ninyo bisan ang katapusang comma ug tuldok sa tanang environmental laws," kusganong awhag ni Emano.