LANAO DEL NORTE -- Nagbilin pa og suicide note ang 44 anyos nga lalaki nga naghikot og pisi sa iyang liog niadtong niaging mga adlaw sa Purok 3, Bansarvil 1, Kapatagan, Lanao del Norte.
Patay si Ronnie Cagaanan, adunay kapuyo, residente sa susamang dapit.
Ang kagawad sa dapit nga mao si Rogelio Batoon maoy nangayo og tabang sa kapolisan human nadiskubre ang patayng lawas niini sulod sa puloy-anan.
Nahimutang ang panimalay niini sa bukid na nga bahin ug maoy naabtan sa kapolisan nga wala na kini kinabuhi ug naghikot na og pisi sa iyang liog. Tapad sab niini ang suicide note nga gisulat pinaagi sa uling.
"Ronie patay babay angging," kini ang nakasulat.
Nasuta sab nga nag-inusara na kining nagpuyo sa puloy-anan ug taod-taod na sige og hisgot nga magpakamatay.
Gani matag kahubog niini, iyang ibangga iyang ulo sa dingding ug moingon nga maayo pang mamatay.