SAYO sa buntag ning unang adlaw sa Kalag-Kalag, maoy gipunteriya ko sa sementeryo sa Carreta ang nitso ni Agaw Meo. Naghuot ang daghang tawo sa sam-ang nga namisita sa lubong sa ilang mga minahal sa kinabuhi nga tua na sa laing kalibutan. Sa atubangan ni Agaw Meo gipahiluna ko pagbutang ang dala kong pungpong sa mga bulak ug duha ka dagkong kandela. Militok kog pipila ka pulong sa pag-ampo alang sa malinawong pagpahulay ni Agaw Meo didto sa langit. Nakapanglingo ko nga naghunahuna niadtong adlaw sa pagkamatay ni Agaw Meo.
Kay ig-agaw sa akong asawa nagtinawganay mig ‘Agaw’ mi Agaw Meo. Katalirungan mig edad nga pulos na mga ‘senior citizen’ sa among barangay sa Lorega. Kanunay mi magkadungan pagkubra sa among binulan nga nga ‘financial assistance’ nga tagsa ka libo ka pesos gikan sa kagamhanan sa siyudad sa Sugbo. Usa ka panday si Agaw Meo nga bulag sa asawa, apan daghan nag gikapuyo nga mga babaye. Nag-inusara siyang nagpuyo sa iyang balay. Ang iyang mga anak nga lalake ug babaye pulos na nangaminyo ug may mga trabaho na sab, apan wala moipon kaniya. Ako ang nag-agni ug nagdasig kang Agaw Meo nga magpasakop sa usa ka relihiyusong kapunongan diin ako usa ka miyembro aron mahiusa gayud sa Ginuo. Apan dungan sad ming nanggawas sa maong kapunongan tungod kay wala na mi makasabot sa nagdumala sa maong karismatik nga grupo.
Sadya kaayo kami si Agaw Meo nga kanunayng magkadungan og kubra sa binulang ayuda sa mga senyor sitisen. Misamot ang among kahinam sa nakalabay nga adlaw sa Septiyembre 21 nga gi-eskidyol nga makubra sa mga senyor sitisen ang balig tulo ka bulan nga ayuda para sa Hulyo, Agusto ug Septiyembre, balig tres mil pesos.
“Gaw, Meo, makakubra na gyud tas atong tres mil pesos ugma!” gipahiyuman ko siya sa bisperas sa tingkubra.
“Bitaw, Gaw Fred. Dungan tag kubra ugma ha!” puno sa kadasig ang mga pulong ni Agaw Meo.
Pagka buntag sa Septiyembre 21 nagganayan na ang mga senyor sitisen sa among barangay paingon sa ‘sports complex’ diin adto ipanghatag tag tres mil pesos kada usa. Maoy nalantawan nako si Agaw Meo nga nag-dyaket nga migula sa ‘sports complex.’ Gisinggitan ko siya, apan wa tingali makadungog kay mipaturatoy man paglakaw. Nagtuo ko nga nakakubra na siya.
Apan daw nabungog ko sa balita sa among mga silingan human nako makubra ang tres mil pesos niadtong buntaga. May nagpahibalo nako nga si Gaw Meo kaadlawon pang namatay sulod sa ilang balay kay gi-atake sa hayblad ug gahi nang napalgan ang iyang lawas nianang pagka alas diyes sa buntag. Nanindog akong balhibo sa kahibulong. Kay klaro ko mang nakita si Agaw Meo nianang alas nuybe sa buntag nga nag-dyaket nga migawas sa sports complex human makakubra sa salaping ayuda sa kagamhanan sa siyudad sa Sugbo. Giadto ko ang pagador nga namayad sa grupo nilang Agaw Meo. Gikumpirmar sa pagador nga nakakubra gyud si Agaw Meo, kay may pirma man niya ang ngalan niya sa ‘voucher’ ug listahan sa mga ngalan sa ilang grupo. Ug daghan pod ang mga silingan ni Agaw Meo nga nakakita niya nga sayo sa buntag kining mipaingon sa ‘sports complex’ nga nagsul-ob og dyaket. Apan unsa bang pagka unsaa, nga namatay na man diay kini nianang pagka kaadlawon?
GITAN-AW ko ang ngalan ni Agaw Meo sa lapida sa iyang nitso. “May kalag gyud diay ang tawo!” mituaw ako. Unya hinay kong mibiya sa nitso ni Agaw Meo ning buntag sa unang adlaw sa Kalag-Kalag. (Katapusan)