WALA mawad-i sa paglaum ang mga kadagkuan sa Augustinian community nga nangulo sa selebrasyon sa ika-500 nga tuig sa Kristiyanismo sa Pilipinas nga motambong si Presidente Rodrigo Duterte.
Mao kini ang pamahayag ni Fr. Aladdin Luzon, ang chairman sa Sto. Niño at 500 Committee. Ang komitiba maoy nangulo karon sa mga preparasyon alang sa ika-500 nga sumad sa Kristiyanismo ug pag-abot sa balaang imahen ni Señor Sto. Niño karong 2021.
Daw nasuko si Presidente Duterte nganong saulogon pa ang pag-abot sa Kristiyanismo nga dala sa mga kolonyalista nga mga Katsila.
Atong nasabtan nga mas gusto ang presidente nga ang sentro sa atong selebrasyon mao si Lapu Lapu nga maoy nibarog batok sa mga langyaw nga kolonyalista.
Tinuod. Angay lang sab nga gamiton nato kining maong kalibotanong selebrasyon aron iduso ang kawsa ni Lapulapu uban sa tanang gisakop sa Espanya.
Lalim bay si Lapu Lapu ang unang nisukol ug nakadaog batok sa labing modernong superpower kaniadtong 1521.
Nakaingon ko nga kalibotanon ang maong kasaulogan kay ang Magellan expedition maoy unang nakatuyok sa kalibotan agi sa kasadpan gikan sa Espanya.
Sa unang higayon, napruweba nga lingin diay ang kalibotan.
Bisan pa man sa kolonyalistang katuyoan sa Espanya, di man malimod nga si Ferdinand Magellan mao ang nagdala sa Senyor ug sa Kristiyanismo dinhi sa Pilipinas.
Gani, moinsister ko nga ang Sugbo nahimong Cradle of Christianity sa tibuok South East Asia.
Sa pagkakaron, moabot sa 80 porsiyento sa populasyon sa Pilipinas kay mga Kristiyano.
Dinhi sa Sugbo, namugna sab ang labing dako ug labing bibo nga kasaulogan alang kang Senyor Sto. Niño nga mao ang Sinulog Festival.
Ang Sinulog nahimo na karong usa ka global celebration.
Sukad nga napresidente si Duterte, wala pa kini makatambong og Sinulog.
Tungod niini, di ko mahibong nga sa kalibotanong kasaulogan nga mao ang ika-500 nga sumad o ika-5 nga sentenyal sa Kristiyanismo sa Pilipinas, moanhi sa Sugbo ug mosalmot sa festivities si Presidente Duterte. (@anol_cebu sa Twitter)