Espinoza: Morag natuk-an

ABUSADO? O, kuwang lang kaha sa edukasyaon kabahin sa balaod ug mga lagda sa trapiko ang drayber sa Barangay Maguikay bus service? Mao ni pangutana nga nisulod sa akong panghunahuna dihang hapit ko masaghiran sa service bus sa Barangay Manguikay nga kalit lang nga mibalhin sa lane sa highway nga akong gisubay dapit sa Liloan, Cebu niadtong Dominggo samtang padung ko uli sa Talamban.

Tungod kay hapit man ko masaghiri sa maong service, nga puti og kolor, ako na lang ang mipreno ug akong gibusinahan makadaghan apan ang drayber mipadayon og balhin sa akong lane mao nga ako na lang ang miurong aron paglikay sa disgrasya.

Nanawag ko ni Mandaue City Vice Mayor Glenn Bercede kay mangutana unta ko sa ngalan sa kapitan sa Maguikay ug mangayo sa kontak number aron akon isumbong apan morag dunay gibuhat si bise mayor kay dili man motubag.

Ako sad gitawagan si Mandaue City Administrator Jamaal Calipayan apan wa motubag. Maayo gani kay mitubag si Guizo Brgy. Capt. Jess Neri sa akong tawag apan wa siyay kontak number ni Maguikay Brgy. Capt. Eduardo Gumera.

Ang mga sakyanan nga iya sa mga barangay iya gihapon na sa panggamhanan ug sa ato pa nakahigot gihapon sila sa mga lagda sa Commission on Audit (COA) nga dili magamit sa mga personal nga katuyoan gawas kon dunay pagtugot sa COA. Gikan sa norte ang maong bus, nga puno sa mga tawo, kay didto pa man nako nasundan dapit sa Danao city ug akong nalabyan diha sa boundary sa Danao city ug Compostela.

Ang mga drayber sa mga sakyanan sa gobyerno kinahanglan dunay husto nga kahibawo sa balaod ug mga lagda sa trapiko aron mahalikay sa disgrasya. Apan naay mga drayber sa mga sakyanan sa gobyerno nga nagtuo nga sila ang hawod kadalanan tungod kay puwa ang plaka sa sa ilang gidrayban. Ayaw mo og pakauwaw oi!

Gani, kamo unta ang modelo sa katarung sa padrayeb sa atong kadalanan. Di kahibudngan nganong nakakuha og lisensya sa pagdrayeb ning mga tawo nga kuwang sa kaalam ug kahibawo sa balaod ug lagda sa trapiko? Kini sila maoy usa sa mga hinungdan sa disgrasya ug kagubot sa dalan.

•••

NATUK-AN? Daghan ang dili makatuo nga dawaton ni Bise Presidente Leni Robredo ang hagit ni Presidente Duterte nga iyang panguhan ang ahensya nga mobatok sa problema sa ilegal nga drogas bisan og supak ang pipila sa iyang mga kauban sa partido. Gani, morag natuk-an ang Malakanyang dihang gidawat ni Robredo ang hagit.

Daghan ang nagduda nga usa ka lit-ag ang hagit ni Presidente Duterte kang Robredo tungod kay sige man siya og saway sa pamaagi ni presidente sa pagsulbad sa problema sa ilegal nga drogas.

Niadtong panahon sa kampanya sa piliay sa presidente misaad si Duterte nga iyang sulbaron ang problema sa ilegal nga drugas sulod sa unom ka buwan. Di ba midaghan na hinuon ang shabu bisan pa sa grabe nga patay sa mga nagpayuhot niini?

Manghinaut ta nga dunay kaayohan nga mahitabo sa pagdumala ni Bise Presidente Robredo ning ahensya nga maoy mosulbad sa dakong problema sa illegal nga drogas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph