KON batasan ug kina-iya lang ang atong basihan, pagkalayo ra gyud nila ni kanhi mayor Tomas Osmeña ug ni Mayor Edgardo Labella. Si Tomas naila nga arogante, madinumtanon ug maginukdanon. Dunay tig-a nga kasing-kasing. Mogukod gyud sa iyang mga kaaway. Samtang si Labella, naila nga masinabtanon ug adunay malumo nga kasing-kasing. Maminaw ug motabang sa mga tawo bisan sa iyang mga kaatbang sa pulitika.
Ania ang comparison: Sa dihang midaog siya niadtong 2016 elections, bisan wala pa gani siya makalingkod kay ang iyang asawa nga si Margot Osmeña ang milingkod isip officer in charge human masuspenso si kanhi Mayor Mike Rama, mimando dayon si Tomas sa pag-imbargo sa mga sakyanan sa mga kapitan nga sakop sa Team Rama. Gi-ingon lang nga inventory kuno apan wala na gipang-uli.
Ang mga kapitan nga nagdumili sa pag-uli, iyang gikiha og carnapping. Carnapping gud intawon nga aduna may memorandum receipts. Unya bisan ang mga ambulance sa kabukiran nga gamit alang sa mga emergency, iyang gi-imbargo. Kon adunay ipanghatag ang City Hall og hinabang sa mga barangay, ang mga kapitan nga iyang kaalyado sa BOPK mao ray buhong.
Samtang maglaway lang ang mga kaatbang. Iyang gitukod ang Barangay Mayor’s Office (BMO) sa mga barangay kansang mga kapitan dili niya kaalyado. Adto niya ihatag ang mga mihuras gikan sa City Hall nga mao na hinooy nakamugna og kontrobersiya tali sa BMO.
Pero karon kang Labella, lahi ra gyud. Sukad milingkod si Labella, walay kapitan bisan ang taga BOPK nga iyang gi-imbarguhan og sakyanan. Walay ambulansiya nga gi-imbargo. Bisan man gani ang pagpanghatag og mga mihuras gikan sa City Hall walay gipinig si Labella.
Adunay gahin ang City Hall sa 2020 annual budget nga P400 million og hatagan ang matag barangay og tag P5 million. Kini aron ilang magamit sa pagapalit og garbage trucks og ubang mga sakyanan nga magamit sa ilang tagsa-tagsa ka mga barangay.
Kuridas ang tanan ma-Barug PDP Laban o BOPK ka man. Nakita ninyo ang deperensiya? (bobbygnalzaro@gmail.com)