GIPAKITA sa defending champions Toronto Raptors nga aduna gihapon sila’y kapabilidad nga makadepensa sa titulo taliwala sa pagbiya ni Kawhi Leonard ug pagkaangol sa ilang duha ka starters pinaagi sa pagbuntog sa usa sa labing gikahadlukan sa 2019-20 National Basketball Association (NBA) nga mao ang hosts Los Angeles Lakers, 113-104, kagahapon.
Nagpakatap og 24 puntos ug 11 rebounds si Pascal Siakam samtang nidugang og 23 puntos ug 10 assists Fred VanVleet aron pangulohan ang Raptors sa pagsanta sa pito ka sunodsunod nga kadaugan sa Lakers.
Kuyaw sab nga nakaduwa alang sa Raptors mao si Chris Boucher, kinsa nitampo og career-high nga 15 puntos, samtang niamot og 14 puntos si Norman Powell.
Ang impresibong kadaugan nahimo sa Raptors bisan wala ang ilang duha ka mga pambato nga sila si Kyle Lowry ug Serge Ibaka, nga pulos adunay angol.
Gamit ang ilang upat ka reserbang mga magduduwa ug si Siakam, ang Raptors nakamaneho gihapon pag-rally sa 4th quarter aron lupigon ang Lakers sa ika-10 nga sunodsunod nga duwa.
“I think everybody that stepped out there didn’t only contribute, but they played awesome,” matod ni Toronto coach Nick Nurse.
Ang rookie nga si Terence Davis nidugang og career-high nga 13 puntos alang sa Raptors samtang nitunol og 10 puntos si Rondae Hollis-Jefferson sa pagbolik pa lang niya’g duwa gikan niadtong Oktubre 26.
“It was great,” asoy ni VanVleet. “Best show I’ve seen all year. Those guys, just seeing them play, I know Coach has been hard on some of those guys, and to see them break through and have a moment, they’ve been working so hard. That’s what the NBA is about, is waiting for your opportunity.”
Ang Raptors ug Lakers pareho nang naggunit og 7-2 nga rekord.
Ang Lakers gipangulohan ni Anthony Davis pinaagi sa iyang 27 puntos, nihatag og 15 puntos si Kyle Kuzma samtang igo lang niamot og 13 puntos si 4-time MVP LeBron James.
“They’ve still got championship players over there,” pagdayeg ni James sa Raptors.
“Don’t matter if they were short-handed. ... They were the better team tonight, for sure. We had good opportunities to win the game, but they turned up in that fourth quarter.”
Sa laing mga duwa, ningdaog ang Denver Nuggets batok sa Minnesota Timberwolves, 100-98 (OT), Phoenix Suns batok Brooklyn Nets, 138-112, Philadelphia 76ers batok Charlotte Hornets, 114-106, Indiana Pacers batok Orlando Magic, 109-102, Milwaukee Bucks batok Oklahoma City Thunder, 121-119, Portland TrailBlazers batok Atlanta Hawks, 125-113 (OT), ug Cleveland Cavaliers batok New York Knicks, 108-87. (AP, ESL)