KON mahimong reyalidad ang tanang mga pangagpas sa nagkadaiyang sports federations sa Pilipinas, kapin sa 200 ka gold medals ang mahakot sa nasod inig host niini sa umaabot nga 2019 Southeast Asian Games.
Sukad masukad, wala pa’y nasod nga nakahakot ning maong gidaghanon sa gold medals ning maong matag duha ka mga tuig nga kompetisyon.
Sa taho sa ABS-CBN News, 90 ka sporting events ang nalantawan nga segurado o dako og poruhan nga makahakot og gold medals alang sa Pilipinas.
Gipangtumbok nga sporting events mao ang athletics (13), arnis (11), wushu (8), dancesports (8), skateboarding (8), Muay Thai (7), Brazilian jiu-jitsu (6), judo (6), taekwondo (5), triathlon/duathlon (5), basketball (4), billiards (4), dragonboat (3), soft tennis (3), ug floorball (2).
Kon apilon ang pangagpas sa ubang national sports associations (NSAs), hayan moburot pa kining maong numero ngadto sa labing daghang gold medals nga makuha sa usa ka nasod basi sa kasaysayan.
Sa usa ka panaghugpong sa RP delegation nga gipangulohan ni Philippine Sports Commission (PSC) chairman William “Butch” Ramirez, gipalista ang 45 ka NSAs nga mopakita’g aksyon sa SEAG kon pila ka gold medals ang ilang makuha.
Human gisumada ang tanan, moabot sa 220 ka gold medals ang posibleng malangkat sa nasod. (ESL)