GIPANEGURO sa NLEX Road Warriors nga dili sila masulod sa laang diin hangupon nila ang ilang kaugalingon isip labing maayong team sa nagpadayon nga Philippine Basketball Association (PBA) Governor’s Cup.
Ang Road Warriors nakapatong sa liderato sa standing human sa ilang makutas nga kadaugan batok sa Magnolia Ang Pambansang Manok Hotshots, 86-85, niadtong Dominggo nga nagpasaka sa ilang rekord ngadto sa 8-1.
Ning maong kadaugan, ang Road Warriors nakaseguro na og twice-to-beat nga benepisyo sa quarter-finals.
Apan alang kang Road Warriors coach Yeng Guiao, daghan pa’ng angayang kaunon nga bugas ang iyang puwersa una kini matawag nga usa ka lehitimong title contender.
“No, never, that’s the worst thing you can think of at this time. We’re still a team that’s learning, a team that sabi ko nga, kulang kami sa experience eh,” pasabot ni Guiao nga napatik sa PBA.PH.
Gitino ni Guiao nga dili talento ang nagpahiluna nila sa kasamtangan nilang nahimutangan kon dili ang ka dako sa ilang kasingkasing.
“Actually, pagdating sa talent, hindi rin naman kami ang most talented team ngayon,” pasabot ni Guiao. “Puro surplus lang mga piyesa namin dito eh,. Pero at least yung makina namin gumagana naman. Puro reject saka surplus mga yan pero yung puso nila brand new; yun ang maganda.”
Gihulagway ni Guiao ang kadaghanan sa iyang mga batos nga mga usik na lang ug gipangbuhian sa ubang teams.
Alang kang Guiao, sagol buwenas na nga nakaabot sila sa ilang nahimutangan karon.
Hinuon malaumon si Guiao nga niabot na ang panahon aron makabawi sila sa mga kasakit ug kapakyasan nga ilang naagian kaniadto. (ESL)