MGA duwa karon
5:15 pm - UC batok USPF (High School)
6:45 pm - SWU batok USC (College)
Mosuway pag-abante sa finals sa ilang tagsatagsa ka mga division ang No.1 teams Southwestern University (SWU)-Phinma Cobras ug University of Cebu (UC) Baby Webmasters batok sa lainlaing kontra sa semi-final round sugod karong hapon sa Cebu Schools Athletic Foundation Inc. (CESAFI) basketball tournament sa Cebu Coliseum.
Ang Cobras makigbatok sa No.4 squad University of San Carlos (USC) Warriors sa main game alang sa college division samtang ang Baby Webmasters makigsangka sa No.4 University of Southern Philippines Foundation (USPF) Baby Panthers sa premirong duwa alang sa high school division.
Isip benepisyo sa ilang pagkasulod sa top two, ang Cobras ug Baby Webmasters parehong naggunit og twice-to-beat nga bintaha ning mga sangkaa.
Gipamatud-an sa Cobras nga dili taphaw ang ilang pagkahimong kampiyon sa pre-season nga mao ang Partner’s Cup pinaagi sa pag-angkon sa No.1 nga luna dala ang 9-2 nga rekord human sa elimination round sa regular season.
Sa ilang gipakita sa Partner’s Cup diin kaduha nila gipukan ang gikahadlukang University of the Visayas (UV) Green Lancers sa finals, daghan ang nagtuo nga ang Cobras mao ang maghari sa regular season.
Tuod man, nagkaduol na ang Cobras sa pagtuman ning maong pangagpas. Ning sangkaa, dili ikalimod nga grabe ka inilog ang Cobras hilabi na kay kaduha nila gipangpilde ang Warriors sa elimination round.
Gipangpukan sa Cobras ang Warriors, 62-59, niadtong Septiyembre 21 ug gisundan kini nila og laing kadaugan, 66-61, niadtong Oktubre 6. Apan giangkon ni Cobras coach Mike Reyes nga aduna gihapon siya’y kabalaka sa ilang pagpakigbatok sa Warriors.
“Their 4 and 5 continuously sets ball screens meaning which means we have to keep on changing our defensive rules,” pasabot ni Reyes sa interbyu sa Sun.Star Cebu, igsuong buhatan ning mantalaan.
Sa iyang bahin, nagkanayon si Warriors coach Bong Abad nga kinahanglan nilang makorihian ang ilang mga sayop nga nabuhat sa nag-unang duha ka mga higayon nilang gikaharong ang Cobras ning maong season.
Ang Baby Webmasters, nga maoy high school defending champions, dili sab angayang molugak bisan gamay batok sa Baby Panthers.
Sa premiro nilang duwa niadtong Septiyembre 28, ang Baby Webmasters mingsubay una og grabeng pagpanghudlat uma nila nalupig ang Baby Panthers, 56-51. (ESL)