GIDALA sa ospital ang usa ka hold-upper, samtang laing duha ka kaubanan niini nasikop sa kapulisan human ilang gitulis ang delivery boy sa usa ka food chain sa Damosa Branch kagahapon sa kaadlawon, Nobyembre 11, didto sa Sasa Bridge, Kilometro 9, Sasa, Davao City.
Ang mga suspek mao sila alyas Jimboy, 17; Eeron Puno Monton, 21, kinsa maoy napusilan sa pulis; ug si James Carl Soterol Andres, 18, pulos nagpuyo sa Sto. Niño Riverside sa maong dapit.
Nasayran nga usa ka delivery boy nga si Martin Paul Rosales Aldea Jr., nagmaneho sa iyang motorsiklo kinsa pabalik na sa tindahan dihang giatngan sa tulo ka mga suspek.
Sa imbestigasyon, migula nga ilang gitionan og kutsilyo ang biktima dayon mideklara og tulis, hinungdan nga nakuha ang kuwarta sa biktima nga P1,000.
Sa gihimong follow-up imbestigasyon sa kapulisan, na-korner ang tulo, apan ang menor de edad ug si Monton misulay og sukol sa pulis dihang gipangdakop na sila.
Si Monton ang miilog sa armas sa pulis, samtang ang menor de edad miaksiyon og dunggab gamit ang kutsilyo nga ilang dala.
Sa Sto. Niño Bridge, nasikop ang mga nahisgutan samtang ang napusilan nga si Monton gidala sa Southern Philippines Medical Center kinsa anaa na sa luwas nga kahimtang.
"This accomplishment only goes to show that your police in Region 11 is quick in resolving cases and serious in its campaign against lawlessness and putting criminals behind the bars of justice," pamahayag sa bag-ong director sa Police Regional Office-Davao Police Brigadier General Filmore B. Escobal.
Kasong robbery ug physical injury ang atubangon nga kaso sa duruha samtang ang menor de edad gi-turnover na sa City Social Services and Development Office alang sa proper intervention. (Jeepy P. Compio)