Cebuano OFW namatay sa Saudi 3 ka buwan milabay

NAMATAY: Si Mark Fernandez, 35, giingong miambak sa usa ka edipisyo sa Al Jubail City sa Saudi Arabia. Apan ang iyang asawa nga si Anabel di motuo. (Tampo)
NAMATAY: Si Mark Fernandez, 35, giingong miambak sa usa ka edipisyo sa Al Jubail City sa Saudi Arabia. Apan ang iyang asawa nga si Anabel di motuo. (Tampo)

TULO ka buwan na ang milabay sukad namatay ang usa ka Sugbuanon nga overseas foreign worker (OFW) sa Saudi Arabia.

Ang Sugboanong trabahante giingong niambak sa building nga iyang gitrabahoan.

Bisan tuod kon tulo ka buwan nang namatay si Mark Fernandez apan, sa miaging semana lang gipahibawo ang iyang asawa nga si Anabel sa iyang kamatayon.

Si Mark, 35, taga dan C. Padilla, Barangay Duljo Fatima, Dakbayan sa Sugbo.

Matod ni Anabel, usa ka magtutudlo, nga si Mark namatay niadtong Agusto 11 pa apan, gipahibawo siya sa Department of Foreign Affairs (DFA) pinaagi sa tawag sa telepuno niadto lang Nobiyembre 4, 2019.

Si Anabel niingon nga ingon sa nahugno ang iyang kalibutan human siya pahibaw-a sa kamatayon sa iyang bana.

Si Mark nagtrabaho sa Al Yusir Industrial Company Ltd. isip general maintenance ug nagpuyo sa Al Jubail City, Saud Arabia.

Ni-apply siya sa usa ka agency nga nagbase sa Malate, Manila.

Nagsugod og trabaho si Mark niadtong 2013

Kay nakaila siya sa iyang bana, matod ni Anabel, di siya motuo nga niambak sa building ang iyang bana.

“Dili ko makatuo nga moambak akong bana. Kabalo ko ato nga fighter to kon naay problema moabot sa iyaha,” matod ni Anabel.

Si Anabel nabalaka nga malangay pa ang paghiuli sa lawas sa iyang bana kay ipailawom pa sa autopsy.

Gusto nila nga mapadali ang pagdala sa lawas sa iyang bana dinhi sa Sugbo.

Nangayo sila og pakitabang kang Secretary Michael Dino, Presidential Assistant for the Visayas, aron mapadangat ngadto kang Presidente Rodrigo Duterte ang ilang hangyo nga mapadali sa pagpauli ang lawas ni Mark sa nasud.

Ingon man maimbestigar usab ang mga sirkumstansya sa iyang kamatayon kay nagduda siya nga wa moambak ang iyang bana sa building. (BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph