TULO ka mga bus ang giandam sa Kapitolyo nga sakyan sa mga partisipante ug turista sa Suroy-Suroy sa Sugbo sa habagatan sa lalawigan karong Biyernes, Sabado ug Dominggo o Nobiyembre 15-17.
Sa kasamtangan, may 147 na ka mga partisipante ang anaa sa lista sa Provincial Tourism Office (PTO).
Kon duna pay gusto moapil sa maong kalihukan, may kahigayunan pa nga makaparehistro kutob akrongh Miyerkules, Nobyembre 13.
Ang dili na ma-accomodate sa mga tourist bus nga giandam, van na ang sakyan.
Nagtungtong sa P10,000 ang labing ubos samtang P16, 000 ang labing taas nga bayrunon alang sa maong kalihukan matag partisipante.
Naglangkob dinhi mao ang pagkaon, puy-anan, sakyanan ug freebies niini.
Gibutyag ni Cebu Provincial Tourism Office Officer-in-Charge Division head, Ma. Lester Ybañez nga siyento porsyento nga andam na sa naasoy nga Suroy-Suroy.
“Basically humana ta og tuyok sa tibuok leg sa southern. Amo na gyud gitan-aw unsa na time kung asa ang init, naa gyud uban mao na nga na-change ang uban sa atong venue,” matod ni Ybañez.
Gawas sa programa, andam na usab ang resorts nga kadangpan sa mga turista atol sa tulo ka adlaw nga kalihukan.
Nagsugod na usab pagpangandam karon ang probinsya sa sunod nga leg sa Suroy-Suroy nga ipahigayon sa Amihanang bahin sa Sugbo karong Enero 2010, sundan kini sa Camotes, Midwest ingon man sa Urban area.
Sa unang adlaw niini sugdan ang maong kalihukan sa lungsod sa Minglanilla sundan kini sa San Fernando hangtod na sa tumoy sa lungsod na sa Boljoon.
Ang tulo ka adlaw nga kalihukan tapuson sa dakbayan sa Talisay kon asa ipahigayon ang fireworks display. (ANV)