SUPERBALITA CEBU

Prosisyon sa dagat sa birhen sa regla karon

PROSISYON SA DAGAT: Usa kini sa yati nga gisakyan sa Birhen sa Regla sa seaborne procession sa miaging tuig diin kanunay daghang mouban nga sakyanan sa kadagatan nga sakyan sa mga deboto. (SunStar File Photo)

DILI mominos sa 300 ka personnel sa Lapu-Lapu City Police Office (LCPO), Armed Forces of the Philippines (AFP), Philippine Airforce (PA) ug uban pang force multiplier ang ipakatap karong adlawa, Nobiyembre 12, palibot sa simbahan sa National Shrine sa Virgen dela Regla sa dakbayan sa Lapu-Lapu.

Kini nunot sa ipahigayong seaborne procession sa pagbali sa nobinaryo alang sa nagsingabot nga kapistahan sa mahal nga patron sa Lapu-Lapu karong Nobiyembre 21.

Matod ni Police Colonel Clarito Baja, ang direktor sa LCPO, nga alas 3:00 pa lang sa kaadlawon ipakatap na ang ilang personnel palibot sa simbahan alang sa seguridad sa mga deboto.

Gawas sa palibot sa simbahan, butangan usab ug mga personnel ang kadalanan paingon sa Barangay Marigondon.

Ang imahen sa mahal nga birhen dalhon pinaagi sa motorkada gikan sa simbahan Birhen sa Regla paingon sa Our Lady of Sacred Heart Parish sa Barangay Marigondon diin ipahigayon ang santos nga misa alas 5:00 sa kaadlawon.

Gikan sa simbahan sa Marigindon dalhon ang imahe sa birhen sa Pacific Cebu Resort PCR sa Barangay Subabasbas alang na sa pagpanukad sa seaborne procession.

Gikatakdang agian sa prosisyon mao ang mga coastal barangay sa dakbayan sama sa Maribago, Mactan, Punta Engaño agi sa Mactan Channel hangtod sa pagtapos na sa procession sa Muele Osmeña wharf nga nahimutang sa atubangan sa simbahan sa Birgen sa Regla.

“Ang ako mga personnel ako gigamit tanan wala ra ta magpa-augment kay pati mga office personnel akong giapil pud diri unya naa man sad tay daghan counterpart diri,” matod ni Baja.

Wala hinuoy nadawat nga taho si Baja nga adunay presensya sa mga dautang grupo nga nalamibigit sa pagpanguot ug pagpangawat nga anaa karon sa dakbayan aron mopahimus sa higayon apan mas maayo nga dili gayud mokompiyansa.

Giawhag usab ni Baja ang publiko nga kung mahimo dili na lang magdala ug bag o daghang mga butang aron dili na mahasol sa ipahigayong inspection sa kapulisan sa entrada sa simbahan.

Giklaro ni Baja nga magpabilin ang hugot nga seguridad sa simbahan sa Birhen sa Regla hangtod na na sa kapistahan sa dakbayan.

“Akong hangyo sa katawhan na ato man ni tanan para sa debosyon sa Birhen sa Regla kinahanglan disiplinado sad ta, mosunod lang ta sa patakaran ug mando sa kapulisan para sa kahusay ug kalinaw ug safety pud sila,” matod ni Baja.

Samtang, ang kapulisan nakigkoordinar na sa Philppine Coast Guard (PCG) ron pagluwat og advisory alang sa mga barko nga moabot sa sayo sa buntag karon sa puwerto sa Sugbo gikan sa nagkalainlaing dapit sa Kabisay-an ug Mindanao nga moagi sa Mactan channel. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph