Poultry farm hayan masirhan; ‘mga kalapasan’ nakita

GIDUAW: Mga opisyal sa Dakbayan sa Toledo ug Barangay Cambang-ug mingbisita sa Emil's Poultry Farm niadtong Lunes sa buntag, Nobiyembre 11, 2019. aron personal nga makita ang sitwasyon taliwa sa mga reklamo sa mga lumolupyo sa dapit. Ang poultry farm gireklamo sa mga lumolupyo tungod sa kadaghan sa mga langaw sa ilang palibot. (Arni Aclao)
GIDUAW: Mga opisyal sa Dakbayan sa Toledo ug Barangay Cambang-ug mingbisita sa Emil's Poultry Farm niadtong Lunes sa buntag, Nobiyembre 11, 2019. aron personal nga makita ang sitwasyon taliwa sa mga reklamo sa mga lumolupyo sa dapit. Ang poultry farm gireklamo sa mga lumolupyo tungod sa kadaghan sa mga langaw sa ilang palibot. (Arni Aclao)

DUNAY kalapasan nga nakit-an ang City Environment And Natural Resources Office sa ilang pagsusi sa Emil’s Poultry Farm sa Barangay Cambang-ug, Dakbayan sa Toledo.

Ang kalapasan may kalabutan sa sanitation ug wa pa usab kini business permit.

Kini ang hinungdan nga pasirhan kini sa mayor, apan iya pang ipasusi ang mga legal nga basehanan.

Ang inspeksyon gipahigayon niadtong Miyerkules, Nobiyembre 6, tungod sa nadawat nga reklamo sa Cenro bahin sa mga langaw nga giingong naggikan sa poultry farm.

Sa pakisusi sa SunStar Cebu sa poultry farm, wa nay mga langaw nga makita sulod apan adunay nagtapok sa mga silinganang kabalayan niini.

Si Marilyn Villamor, 42, residente sa barangay, nisaysay nga grabe kadaghan ang mga langaw sa ilang lugar, labina gyud kon magkaduol na ang pag-harvest sa mga manok.

“Kon dayon harvest kay times 10. Mosulod pa sa balay maski unsaon pa. Ang hayhayan mapuno og langaw, samot na kon magabii,” sigon ni Villamor.

Adunay duol nga tunghaan sa poultry farm ug daghan mga maestra nga niingon nga samok kini tungod kay di na makapaminaw ang ilang mga estudyante tungod sa sigeng pamugaw sa mga langaw gamit ilang mga paspas.

Ang mga estudyante usab nireklamo nga di sila makatarong og suwat tungod sa kadaghan sa mga langaw nga magsige og tugdon kanila.

Gibisita usab sa City Veterinarian ug City Legal, mga empleyado sa Toledo ug mga kawani sa barangay hall sa Cambang-ug aron lantawon kon tinuod ba ang mga reklamo sa mga residente.

Matod ni City Veterinarian Nelcy Gardon nga sa ilang pagsusi, gamay ra ang langaw sa poultry farm.

Apan iyang kini gitambagan ang nagdumala nga ipausab ang net ibabaw sa tunnel vent nga butangan sa mga manok ngadto sa gamay nga mga buslot aron di makalusot ang mga langaw agi niini.

Ang tag-iya sa farm nipakita sa ilang mga dokumento aron pagpamatuod nga nisubay sila sa balaud.

Andam usab sila moimbitar sa mga kawani sa city veterinary office, City Health Department ug uban pa aron ipakita nga dili tinuod ang mga reklamo sa mga residente.

Sirhan

Si Toledo City Mayor Marjorie Perales wa siya nakadawat og request for approval nga business permit gikan sa poultry farm.

Iya usab ni gipasubay kon gihatagan ba kini sa termino ni kanhi mayor Sonny Osmena, apan wa silay nakita.

“So far, considered as closed gyud na sila kay wala may business permit. I will talk with my legal officer tomorrow kon unsay ma penalty nila. Operation without a business permit, dako kayning labag sa batas,” pasabot ni Perales.

Sigon usab niya nga maghimo siya og grupo aron susihon ang tanan poultry farm ug baboyan sa ilang lungsod.

Sutaon sa grupo kon nagsubay ba kini sa mga rekisitos aron di makasamok sa mga residente ug di mahulga ang panglawas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph