DEAD on arrival sa Cebu City Medical Center (CCMC) ang duha ka mga biktima sa pagpamusil, Dominggo pasado alas 8 sa gabii, Nobiyembre 11, 2019, sa Sityo Cabancalan 1, Barangay Bulacao, Dakbayan sa Sugbo.
Si Police Major Jhon Kareen Escober, hepe sa Pardo Police sa Cebu City Police Office (CCPO) niila sa duha ka mga biktima nga sila si Victoriano Gabaca Jr., alyas Tikab, 22; ug John Mark Cañeda, 16, pulos mga lumolupyo sa dapit.
Ang upat ka mga killer riding in tandem, sakay sa duha ka mga motorsiklo.
Sa imbestigasyon sa kapulisan sa lugar sa nahitaboan, sila si Gabaca ug Cañeda nagsakay sa usa ka traysikad samtang nag-estorya daplin sa dalan.
“Base sa mga sulti sa mga tawo didto, duha ka motor ang miabot. Unya duna man toy angkas, usa usa”Matud ni Escober.
Wa magdugay, mga tawo sa dapit nakadungog og mga buto.
Kay ber months na man, sila nagtuo nga mga pabuto lang ang ilang nadunggan.
Human sa mga buto, sa ilang pagsusi sa gigikanan, didto na nila nasuta nga ang buto gikan sa gi-park nga traysikad.
Nangahagba na ang ang duha ka mga biktima ug nagkaguliyang na sila.
Ang duha dali nga gidala sa CCMC apan, gideklarar sa doktor nga DOA.
Ubay-ubay nga mga samad sa ulo ang naangkon ni Gabaca samtang sa kalawasan usab naigo si Cañeda.
‘Tulisan’
Matod ni Escober nga sa ilang pagkuha og mga impormasyon sa pagkatawo sa duha, nasuta nga si Gabaca notado nga tulisan.
Giingong magsige kini og panulis sa Dakbayan sa Talisay ug Siyudad sa Sugbo.
“Maoy among nakuha nga mga sulti sa mga tawo didto nga kini si Tikab o Gabaca mag sige lang daw ni og panulis,” matod ni Escober sa Superbalita Cebu.
Sutaon pa hinuon kini sa kapulisan kon unsa ka tinuod ang nadawat nila nga mga impormasyon.
Si Cañeda way record sa ilang buhatan.
Dugang pa ni Escober nga sa ilang inisyal nga motibo, posibleng ang kabahin na sa pagka tulisan sa biktima.
“Wala gyud mi makita apan dunay posibilidad tong sa iyang pagpanulis kaniadto. Posibleng pagpanimalos ba kaha o nag away away ni sila mao lagi na akong pangagpas, “matod ni Escober.