DILI igsapayan sa pangulo sa Simbahang Katoliko sa Sugbo, Archbishop Jose Palma kon dili man suportado ni Presidente Rodrigo Duterte ang mga kalihukan alang sa kasaulogan sa simbahan sa ika-500 nga Kristiyanismo sa nasud.
Kini ang gitug-an ni Archbishop Palma atol sa iyang pakighinabi sa mga tigbalita, Lunes sa buntag, November 11, 2019. Miyerkules, Nobyembre 13, himuon ang grand launching sa mga kalihukan alang sa ika-500 nga kasumaran sa pag-abot sa milagrosong imahen sa Senior Santo Niño.
Si Papal Nuncio to the Philippines, Most Reverend Gabriele Caccia ang mangulo sa Santos nga Misa.
Giklaro ni Palma nga importante si Duterte nga motambong isip maoy pangulo sa nasud, apan ang dili niini pagsuporta, dili makapahunong sa minilyon ka mga Kristiyano.
"From our end no matter what the president will say, he is just one percent when we think of 500 years. He maybe the president ha, but from our own level, there are people that would say, di man nimO mapaundang ang Sinulog kon dili siya mo-attend," pasabot ni Palma.
Kahinumduman nga atol sa pagduaw ni Presidente Duterte sa Siyudad sa Naga, niadtong Setyembre ning tuiga, nipadayag kini nga dili gyud siya mopaluyo sa kalihukan sa quincentennial sa Kristyanismo kay dala kini sa mga Espanyol nga nisakop sa Pilipinas ug nipasakit sa ubang mga Pilipino kaniadto sud usa sa gatusan ka mga tuig.
Mas ilhon pa niya ang 500 ka tuig nga kasumaran sa bayanihong gihimo ni Datu Lapu-Lapu pagpatay kang Portuguese explorer Ferdinand Magellan, usa sa mga nagpaila sa Kristiyanismo.
Hinuon bisan pa man sa pamahayag ni Duterte, niadtong Mayo 8 sa niaging tuig, ni-isyu kini og Executive Order No. 55 alang sa pag-umol sa National Quincentennial Committee nga maoy gitahasan alang sa mga preparasyon. (FMD)