GATUSAN ka mga ginikanan sa dakbayan sa Talisay ang nisalmot sa gihingusgan nga programa sa Population Commission (PopCom) sa Central Visayas.
Kabahin kini sa ilang caravan sa PopCom nga gisugdan sa niaging bulan, agig paghingusog sa pagpatuman sa National Program on Population and Family Planning.
Si Keannu Arnoco, provincial coordinator on responsible parenthood and family planning, nitug-an nga gihimo kini human usab nga usa sa gihimug-atan ni Presidente Rodrigo Duterte sa iyang State of the Nation Address ang kalabot sa kakabus tungod sa padayon nga pagsaka sa populasyon.
Hinuon, gitug-an ni Arnoco nga ang populasyon sa nasud ang anaa sa 106 milyon, ug nga ni-us-os man hinuon og one percent sa niagi nga tuig, apan gilantawan nga gamay ra kaayo, hinungdan nga gihingusgan pa ang mga programa.
Ang caravan ang nahimo na sa lungsod sa Badian ug Argao, diin sa tunga sa adlaw gihimo ang pagpasabot kalabit responsible parenthood ug family planning.
“Nag-caravan mi sa province of Cebu. Talisay City is already the third place we visited. First was Badian, followed by Argao town (southern Cebu). The objective of the program is to emphasize, to really encourage parents, especially mothers the importance of being responsible one, and to be responsible. One of it is to avail the family planning services that are free in our rural health unit and even in the barangays,” saysay ni Arnoco.
Ug sa hapon mao ang pagpang-apud-apod sa mga contraceptives, sama sa pills, condoms ug uban pa, hinungdan nga matud ni Arnoco nga nagtambayayong sila sa Department of Health ug sa mga lokal nga kagamhanan aron matunhay ang programa.
"DOH’s rule on the program is for the service delivery, such as giving contraceptive, the pills, condoms, injectables and other services," dugang ni Arnoco.
Ang maong programa ang gihangop sa mga inahan sama nalang ni Gernalyn Fuentes, 32 anyos, kinsa adunay lima na ka anak, taga Barangay Cansojong.
"Pasalamat sad mi ani kay nakat-on mi nga dili sad maayo nga mag-sunod-sunod akong pagpanganak, kay gawas nga lisud ang pagbuhi, kuyaw sad sa akong kinabuhi," asoy ni Fuentes.
Nihimo usab sila og seminar, ngadto sa mga barangay health workers alang sa mga bag-ong palisiya ug progrma sa PopCom ug DOH kay sila na usab ang motuyo sa kabalayan alang sa mas pagpagsabot ug pag-ila kon si kinsa kining mga nagkinahanglan sa maong serbisyo. (FMD)