SUPERBALITA CEBU

Sugilanon: Ang paagi

NAHIDAGSA ako sa purok lemonsito, Barangay Gun-ob, dakbayan sa Lapu-Lapu aron manimpalad. Lisod man god ang among pagkabutang sa Bukidnon. Buot kong mamasin nga makasulod og trabaho sa usa sa mga kompaniya sa Philippine Economic Zone Authority (PEZA) kay gradwado man ako sa hayskol.

Nagsaka lang ako sa balay nilang Tiya Edyong, maguwang ni Tatay Jose, nga naminyo og taga Lapu-Lapu. Mihangyo kong Tiya Edyong nga sa ilaha lang ko mag-abot ug maghatagan lang kog binuwan sa usa ka kuwarto.

Nasuod ko ang akong ig-agawng si Bebie nga katalirungan ra nakog edad. Misuway kamig pangaplay og trabaho sa mga kompaniya sa PEZA apan demalas kay wala gyuy usang midawat. Wala kami makalabang sa mga pagsuway nga gihatag sa tagdumala.

Hinuon, paglabay sa mga adlaw nakasulod kog kahera sa usa ka department store sa Pajo. Nagmantinil lang una ko niini bisag gamay rag suweldo aron makahatag ko kang Tiya Edyong sa akong obligasyon.

Usa niana ka gabii nahisgutan namo ni Bebie ang bahin sa ulitawo namong silingan nga si Titing. Nangutana kuno kini bahin kanako. Kinsa kuno ko ug taga diin.

“Unya imong gisultihan?”

“O, uy. Ug abi mo, Lolit, morag naka-like siya nimo,” ni Bebie. “Mamisita kuno siya nimo ugma sa gabii.”

Wala dayon ako makatulog sa gipanulti ni Bebie. Mipasunding sa akong hunahuna ang panagway ni Titing. Kanunay ko na siyang makita nga moagi sa among tugkaran nga magkabiba og bag kay nagtrabaho man siya sa Waterfront Hotel.

Dihang mibisita si Titing kanako nianang misunod nga gabii, gipasaka ug gipalingkod siya ni Tiya Edyong kay naatol man nga didto ako sa akong lawak.

Tuod man, nagkahigugmaay gyud kami si Titing. Gisugot ko siya luyo sa kamatuoran nga aduna na akoy uyab sa Bukidnon. Apan wala ko mahigugma kang Ben. Napugos lang ko pagsugot kaniya kay nanghulga mang manghikog.

Malipayon kami si Titing sa among relasyon. Bisan asa lang kami manuroy sa higayong wala kamiy trabaho. Unya nakadawat akog mensahe sa teks gikan kang Ben nga nanghagad na og kaminyuon. Nakalitan ko kay di pa ako andam sa maong butang. Gawas pa, wala akoy gusto kaniya. Atua kang Titing ang akong kasingkasing. Mao tong gibalibaran ko si Ben. Pero nanawag kanako si Nanay Baday ug namugos nga pakaslan ko ang ulitawo. Gusto nila nga si Ben ang akong mabana bisan supak sa akong kabubut-on. Busa nangita kog paagi nga dili nila mapugos. Unya dihay hukom nga naumol sa akong alimpatakan.

Unya dihang nanan-aw kamig sine si Titing, wala namo matuhog ang estorya sa salida, kay lain man ang iyang gikalingawan. Luhag kaayo ang iyang mga kamot nga mikupay sa mga gilok nga bahin sa akong lawas samtang nag-ukobay ang among mga ngabil. Nangimugkimog ang akong kaunuran sa iyang gibuhat. Unya diha siyay gihunghong kanako nga ako usab gipaundayunan. Mao na kini, nako pa sa kaugalingon.

Nanggawas kami sa sinehan ug nanakay og taksi. Didto kami mosangko sa usa ka motel sa Sangi. Among gisawhan ni Titing ang dugam-is sa gugma niadtong gabhiona. Ug ang maong hitabo nasundan pa sa makadaghan ug pagpanglabay sa mga adlaw wala na ako tunghaa sa binuwan kong sakit, butang nga gikahimuot ko sa hilom kay pinaagi niini dili na ako mapugos nila ni Nanay Baday sa pagpakasal kang Ben. (Katapusan)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph