LISOD sabton karon ang trabaho ni Vice President Leni Robredo.
Gitudlo siya ni PRRD isip co-chair sa Inter-agency Committee on Anti-Illegal Drugs (ICAD).
Buot ipasabot, kauban ni VP Leni ang Philippine Drug Enforcement Agency (PDEA) nga gipangulohan ni Gen. Aaron Aquino ang maglingkod sa maong komitiba.
Sumala pa sa Executive Order No. 15 nga maoy nagtukod sa ICAD, ang ICAD mao ang motutok ug magpadagan sa kampanya batok sa ginadiling druga.
Apil sa maong komitiba ang 20 ka mga ahensiya sa gobyerno, apil na ang military.
Bisan semana pa kapin ang milabay sukad siya gitudlo, daghan na dayon og gibuhian nga mga pulong si Robredo.
Undangon ang Oplan Tokhang. Undangon og bag-ohon ang mga pamaagi sa kampanya sa druga. Dugangan ang budget sa ICAD. Magamit og body camera ang mga polis nga moapil sa mga raids nga pagahimuon.
Ug daghan pa.
Ang nakaparat niini, wala pa siya makahibalo og unsa man gyod ang iyang katungdanan isip co-chair.
Ngano man?
Kay wala pa man sila magka-estoryahay ni PRRD bahin sa iyang bag-ong trabaho.
Maayo unta kon siya ang chairman, dili kay co-chair lang.
•••
Gani, daghan ang nagtuo nga non-existent ang iyang posisyon sanglit wala pa man giusab ang EO 15.
Ang EO 15 nagtudlo sa PDEA nga maoy chairman sa maong komitiba. Asa man isuksok si VP Leni nga wala man kini maapil sa maong EO?
•••
Buyno, kon mao kini ang gusto ni PRRD nga co-chair si VP Leni, sayon ra kaayo usbon ang maong EO.
Buot ipasabot, dali ra kaayo usbon ug iapil si VP Leni isip co-chair sa maong komitiba kauban ang PDEA.
Sayon ra kaayo ang pag-usab sa EO 15 og hatagan si VP Leni sa iyang trabaho sa maong komitiba.
Sayon ra kaayo ang pagtudlo kaniya nga siya na ang magbuot sa tanang kalihokan sa ICAD, apil ang inadlaw nga pagpadagan niini.
Apan kining tanan, haka-haka pa lamang sa pagka-karon tungod kay wala pa man kini mahitabo.
Gani, mismo si VP Leni misulti na man nga siya mismo wala pa makahibalo sa iyang trabaho. Ang pangutana – nganong nag-una una na man siya sa iyang buhaton nga wala pa man siya maapil sa EO 15?
•••
Daghan ang nagtuo nga wala pay aktuwal nga kasinatian si VP Leni sa gitawag og buy-bust o mga raid ba kaha batok sa ginadiling druga.
Wala pa siya kakita og unsa man gyod ang mahitabo kon dunay pagahimuon nga raid sa mga lugar nga gipuy-an sa mga nag-negosyo sa ginadiling druga.
Buot ipasabot, dili siya makasulti kon unsa man gyod ang bation sa mga kapolisan nga moapil sa maong raid kon mag-atubang na sila sa mga tawo nga nagdala og armas unya andam makigpinusilay sa mga kapolisan.
•••
Nagpasabot ba kini nga kon tawgon nga wala masulbad ni PRRD ang problema sa nasod, makahimo si VP Leni pagsulbad niini? Husto ba ang pagtuo sa uban nga mas makamao mosulbad si VP Leni sa problema sa druga?