KARONG tuiga mao ang ika-27 nga kasumaran sa pagtimaan sa Buwan sa mga Bata o Children’s Month ubos sa tema nga “Karapatang Pambata, Patuloy na Pahalagahan at Gampanan Tungo sa Magandang Kinabukasan.”
Nangulo sa maong kalihokan ang rehiyonal nga buhatan sa Department of Social Welfare and Development (DSWD) ug giduyugan sa gatosan ka mga indibidwal gikan sa mga nagkadaiyang kahugpongan nga nagpakabana, nibarog ug nanalipod sa katungod sa mga bata.
Ang tibuok buwan sa Nobembre mao ang gitakda nga pagtimaan sa buwan sa mga bata. Sa nakalabayng mga katuigan ang Buwan sa mga Bata gisaulog sa buwan sa Oktubre nabalhin kini sa buwan sa Nobiyembre duha ka tuig pa lamang ang nakalabay gumikan sa pagsagop sa Pilipinas sa Convention on the Rights of the Child sa United Nations General Assembly nga gipirmahan niadtong Nobiyembre 20, 1980.
Tungod niini nipalabang ug balaud ang kongreso pinaage sa R.A. 10661 nga nagtakda sa tibook buwan sa Nobiyembre nga mao ang pagtimaan sa Buwan sa Kabataan sa tibook nasud.
Taliwa sa nagkadaghang mga balaud nga napanday alang sa pagpanalipod sa kabataan subo kaayo nga pamalandungon nga nagkadaghan usab ug gani nagkasopistikado na ang mga modus operandi sa mga tawo niabuso sa mga bata labi na ang mga banyaga nga uhaw kaayo sa kalipay sa unod ug lawasnong himaya. Usa sa kamatuoran niana ang tulo ka managlahing operasyon sa mga awtoridad sa probinsya ug dakbayan sa Sugbo.
Una nga nasignit sa kamot sa mga otoridad didto sa Lungsod sa Consolacion si Collin Paul Bell, 50, usa ka British national. Si Bell gipasanginlan nga niabuso sa 6 ka mga batang babae.
Sunod nga nasikop dinhi sa Dakbayan sa Sugbo mao si William Anthony Becket, 50, usa ka British Nntional.
Si Becket gipasanginlan nga niamong among sa duha ka mga batang lalaki.
Samtang lain usab nga napusasan sa mga pulis didto sa Lungsod sa Malabuyoc mao ang Italyano nga si Alesandro Montovani, 66, usa ka retirado nga magtutudlo didto sa nasud sa Italya.
Si Montovani gipasanginlan nga nibuong sa kadungganan sa tulo ka mga managsuon.
Ang tulo ka mga banyaga pulos na karong nagtingkagol sa prisohan samtang isang at na ngadto sa korte ang kasong kriminal nga gihaon para kanila.
Tinuod, dili tiaw ug dili sama kasayon sa pagsulti lamang ang pagbuhat sa mga lakang aron nga kapanalipdan ang katungod sa kabataan.
Gikan sa paghipos ug mga inpormasyon, pagpaniid sa mga kalihokan sa mga malapason, pagtigum ug mga ibedensya sa pagpangabuso, pakiglambigit sa mga tinugyanan sa balaud, pagpahigayon sa operasyon, paghikay sa dokumento alang sa kaso sa mga dinakpan, pagsustiner hantod masilotan ang akusado sa korte ug ang pag amoma sa mga biktima.
Bisan pa man niining tanan nga mga makuti ug hasol nga proseso ang CLB dili maluya ug magpabiling lig-on ug matinud anon sa iyang gibarugan nga kausa nga mao ang pagprotihir sa katungod sa mga bata ug ang paghatag og makiangayon nga kalibutan sa kabataan.