BORONGAN, Eastern Samar - Unom ka mga sundawo ang kompirmadong nangamatay samtang 20 ang samdan sa ambush sa gituohang mga rebeldeng komunista niadtong Lunes sa hapon, Nobiyembre 11, 2019, sa Barangay Pinanag-an ning siyudad.
Mga rebeldeng New People’s Army (NPA) nigamit og improvised explosive device (IED) nga ilang gipabuto sa mga sundawo nga nagpatrolya.
Ang tulo ka sections sa kasundalohan sa 14th Infantry Battalion sa Philippine Army nagpahigayon og combat patrol sa bukirang dapit ning siyudad nga gilubloban sa mga NPA.
Atol sa patrolya, unom ka mga IED ang sunodsunod nga nibuto ug nisunod ang engkwentro sa duha ka mga habig.
Gibana-banang 50 ka mga NPA ang nakaengkwentro sa mga sundawo. Ang pinusilay gibana-banang nilungtad og 30 minutos.
Atol sa engkwentro, usa ka wa pa mailhing NPA ang napatay.
Ang unom ka mga sundawo nga nangakalas giilang mao sila si Sgt. Rex Jadulco, Cpl. Ronald O Go, Cpl. Limar L Banug, Pfc. Kent Loyd M Agullo, Pvt. Charlie P Del Rosario ug Pfc. Junmar D Buranday.
Mokabat usab sa 20 ka mga sundawo ang nangasamdan ug dali nga gipanguha sa dapit ug gidala ngadto sa Camp Lukban hospital sa Catbalogan City sa Samar sud sa headquarters sa 8th Division sa Philippine Army aron matambalan.
Ang mga samdan mao sila si Sgt. Kenneth John Arcina, Sgt. Cyril Baja, Sgt. Rando Soria, Pfc. Albert Abegonia, Pfc. Denmark Gonsaza, Pfc. Dandreb Gealon, Pfc Reil Bilason, Pfc. Gilbert Renegado, Pfc. Rex Batis, Pfc. Jerwin Omrob, Pvt. Darwin Aborquez, Pvt. Joshua Pacuan, Pvt. Roger Moore Ditche, Sgt. Marlon Orsal, Cpl. Dominador Antonio, Cpl. Aljon Aguillos, Cpl. Linlito Donayre, Pfc. Mark Geric De Leon, Pfc. Rene Abuda ug Pvt. Jayson Beros.
Ang Barangay Pinanag-an dunay gilay-ong 22 kilometros gikan sa Borongan City.
Ang dapit hilit kaayo ug dunay 12 kilometros gikan sa Barangay Cantolerio, ang labing duol nga dapit nga masudlan og sakyanan.
Sa paghimo ning balita, padayun pa ang operasyon sa kasundalohan uban sa Philippine Air Force (PAF) nga nipadala og air support
Niadtong Mayo ning tuiga, nadiskobrehan sa mga sundawo ang usa ka kampo sa NPA sa samang barangay ug ilang nailog.