PADAYON nga makasinati og madag-umon nga panganod ang Sugbo tungod sa pagkahimo na og bagyo sa low pressure area nga karon gitawag og Bagyong Ramon.
Apan tungod kay pasaka ang bagyo, makasinati na og maayo nga panahon ang Sugbo sugod sa Huwebes.
Matod ni Philippine Atmospheric Geophysical Astronomical Services Administration (PAGASA) Visayas officer-in-charge (OIC) Al Quiblat nga nahimong bagyo kagahapon sa buntag ang LPA mga 835 kilometros sidlakan-habagatang sidlakan sa Virac, Catanduanes.
Paingon kini sa amihanang bahin sa Luzon diin nagdagan kini sa 20 kilometros matag takna.
Kining extension sa bagyo o trough mao ang rason nga apektado ang Sugbo niining kalit nga pag-uwan ug madag-umon nga panahon.
Dugang ni Quiblat nga sulod sa 48-oras mamahimong tropical storm ang bagyo gikan sa tropical depression.
Sa Visayas, ang Eastern ug Northern Samar mao ang makasinati og grabe nga pag-uwan ug kusog nga hangin.
Sa pagkakaron, anaa sa 30-40 kilometro ang takna sa hangin nga nasinati sa Sugbo ug posible kining mosaka ngadto sa 50 kilometros matag takna.
Apan anaa sa 50-60 kilometros matag takna ang gikusgon sa hangin kon pananglitan ipaubos na sa gale warning ang usa ka lugar.
Alas 5 sa hapon, Martes, dihang nasigpatan ang bagyo sa 670 kilometros sidlakan sa Borongan City, Eastern Samar.
Anaa sa 55 kilometros matag takna ang gidala nga hangin niini ug pag-unos nga 70 kilometros matag takna. Gipaubos na sa signal number 1 ang Eastern Samar ug ang sidlakang bahin sa Northern Samar.
Tungod sa kahinay niini ug kon dili mausab ang dagan niini, mo landfall kini sa Northern Luzon karong Dominggo pa ug mogawas sa Philippine Area of Responsibilty (PAR) sunod semana. (HBL)