KANHI tig-deliver og hotdog apan, nibalhin sa pag-deliver og shabu nadakpan sa entrapment operation sa Philippine Drug Enforcement Agency (PDEA) 7 sa Barangay San Roque, Dakbayan sa Sugbo niadtong Lunes sa gabii, Nobiyembre 11, 2019.
Si Lester Ablay, 27, alyas Upaw, taga Palma st., Barangay San Roque, kanhi delivery boy og hotdog sa usa ka inila nga kompaniya apan, niundang aron mobalhin sa pag-deliver og shabu.
Ang poseur buyer ug si Ablay nagkasinabot nga mag-abot sa usa ka waiting shed sa dan N. Bacalso, sakop sa Barangay Labangon ning siyudad.
Ang tigpamaba sa PDEA-7, Leia Alcantara, nibutyag nga usa ka impormante ang nihatag sa ilang buhatan og impormasyon kalabot sa mga kalihukan ni Ablay.
Giingong moabot sa usa ka kilo matag semana ang mabaligya ni Ablay sa mga dapit sa Dakbayan sa Sugbo, Dakbayan sa Mandaue ug lungsod sa Consolacion.
Mobalor og P50,000 nga boodle money ang ipalit kunohay kang Ablay base sa ilang nasabutan.
Nasakmit kang Ablay ang 50 gramos sa gituohang shabu nga giputos sa papel gipalibutan sa packaging tape ug gisulod sa paper bag.
Duna kini Dangerous Drugs Board (DDB) value nga P340,000.
Si Ablay dihang gikahinabi sa Superbalita Cebu, niangkon hinuon nga kusog ang iyang delivery sa shabu kay sa iyang trabaho kaniadto.Maayo usab ang iyang kita niini.
“Nisugot lang ko, Sir. Asa man ko mangita anang P500 unya usa lang ka oras.Aw maayo lang og moabot og usa ka oras,” butyag ni Ablay.
Kaso nga pagpamaligya ug paghupot og ginadaling drugas atubangon nga kaso ni Ablay.
Mandaue City
Duha ka mga lalake nasikop human nakuhaan og P204,000 sa gituohang shabu human sa buy-bust operation sa Sitio Superior, Barangay Looc, Dakbayan sa Mandaue, kaadlawn sa Martes, Nobiyembre 12, 2019.
Ang mga suspek giilang sila si Arman Avanceña, alyas “Abra”, 28, kinsa mao ang target sa operasyon ug si Danilo Rosal, 37.
Sigon ni Police Major Aldrin Villacampa, nangulo sa operasyon, nga nagpahigayon sila sa buy-bust operation human makadawat og lead gikan ni alyas “Oka” nga dinakpan sa checkpoint sa Mandaue City Police Office (MCPO) Station 2 niadtong Biyernes, nga si alyas Abra ang ilang palitanan sa shabu.
Dugang ni Villacampa nga kadaghan na nga higayon sila makadungog sa ilang mga dinakpan nga ang ilang mga shabu gipalit nila kang “Abra”.
Mokabat ngadto sa 30 gramos sa shabu ang nasakmit sa duha ug nasakmit sab sa kapulisan ang usa ka .22 Magnum revolver nga adunay lima ka mga bala nga gidala-dala ni Rosal.
Gituohang si Avanceña contact ang kini sa mga mamalitay og drugas apan dili kini mao ang lider sanglit batan-on pa kini sama pa ni Villacampa.
Ang maong buy-bust operation usa ka joint operation sa Criminal Investigation Branch sa MCPO ug PDEA 7.