Dura: Unsay maayong himuon kontra druga?

HUMAN gidawat ni Vice President Leni Robredo ang hagit ni Pangulong Rodrigo Duterte isip co-chairperson sa Inter-Agency Committee on Anti-Illegal Drugs (ICAD) sa nasud, daghan ang mibatikos kaniya tungod sa iyang pamaagi.

Kadaghanan sa akong mga higala nagsulti nga angay tutukan ni Robredo ang iyang trabaho kaysa magsige og yawit atubangan sa media.

Usa na kanila si House Speaker Alan Peter Cayetano kinsa nagsulti nga sukad gidawat ni Robredo ang appointment, kanunay lamang siya magpa-interview sa media imbes istoryahon niya sa pribado nga paagi ang mga ahensya sa gobyerno.

Iyang pahayag miguwa human kanunay nagpa-interview si Robredo sa media ug nakigpulong sa United Nations Office on Drugs and Crime (UNODC) sa iyang tinguha nga mohangop sa labing maayong paagi ug biyaan ang duguon nga giyera kontra druga.

Ang ikaduhang pangulo nagtinguha sa mas komprehensibo nga paagi sa pagsumpo sa suliran sa druga pinaagi sa pagtratar niini isip public health issue ug walay patay.

Dinhi nagyawyaw ang mga mipabor sa duguon nga kampanya sa druga sanglit alang nila, mas masumpo ang druga kung magbaton og kahadlok ang magpayuhot og druga.

Sa ako nang gibalik-balik sa diskusyon namo sa programa sa radyo nga daghan ang mamahimong solusyon.

Sa hisgutanang pagpugong sa mga kabataan, kinahanglan aktibo ang local officials sa ilang mga diversionary programs alang sa mga kabataan. Kinahanglan nga itisok sa ilang huna-huna ang grabe nga epekto sa druga nga makadaut sa utok ug kaugmaon sa tawo.

Sa pagtabang sa mga nalambigit na sa druga, mas maayo nga ibubo sa gobyerno ang pundo alang sa mga community-based rehabilitation centers aron mahibalik sa normal ang kinabuhi sa nakagamit sa druga. Di kay pasagdan lang nila ang kabataan.

Kon pagpugong sa suplay sa druga ang sulbaron, kinahanglan sab nato ang tabang sa mga international organizations ug kaalyadong mga nasud aron mailhan ug madakpan ang mga langyaw nga sindikato sa druga.

Ug aron mapugngan katahap sa katawhan nga ang mga drug pusher gituyo pagpatay sa mga otoridad, kinahanglan nga ang polisiya nga magpugong sa malditong pulis nga patyon ang ilang madakpan.

Kinahanglan nga dunay imbentaryo ug tipigan ang mga armas nga narekober gikan sa mga drug pushers nga misukol kuno sa kapulisan.

Bitaw, sa kanunay nakong pag-uban sa drug raid kaniadto, mogawas gyud ang komedya nga ilisan na sa pulis ang .38 revolver aron di sila dudahan.

Ug labaw sa tanan itunol sa tagtungod ang tanang impormasyon lakip na medico legal report sa napatay nga drug personalities kung kini wa silay gitagoan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph