DEAD on the spot ang usa ka ex-convict human pusila sa wa mailhing mamumuno alas 9:35 sa gabii niadtong Lunes didto sa kanto Sarenas ug Garcia Heights, Brgy. 19-B, Poblacion Davao City.
Ang biktima nailhang si Joseph Fabutt Mahilum, alyas Otep, 43, minyo, habal-habal drayber ug nanimuyo sa nahisgutang lugar.
Sa inisyal nga imbestigasyon sa Homicide Section sa San Pedro Police Station, nasayran nga samtang nag-atang og pasahero ang biktima sa kanto Sarenas, kalit siyang gihunongan sa mamumuno kinsa sakay sa motorsiklo, dayon pusil kaniya.
Gilayong nahagba ang biktima sa iyang gitindugan samtang ang mamumuno dali sab nga misibat padung sa wa matino nga direksiyon.
Si Police Major Melvin Joseph Violan, hepe sa San Pedro PNP nagbutyag nga niadtong 2012 ang biktima naka-benepisyo sa Plea Bargaining sa kasong pagsupak sa Republic Act 9165 kun Comprehensive Dangerous Drug Act of 2002 kinsa nakagula gikan sa Maa City Jail, Nobyembre 22, 2018.
Ang San Pedro PNP mihimo na og makuting imbestigasyon sa hitabo aron masikop ang mamumuno sa krimen.
Ang patay nga lawas sa biktima anaa na sa Angel Funeral Homes sa dalang F. Torres, dakbayan sa Davao. (JPC)