KIDAPAWAN CITY -- Nadoble ang pasakit nga gibati karon sa mga bakwit sa linog sa Makilala, North Cotabato human nga gikuso-kuso sa buhawi niadtong Lunes sa alas 4:15 sa hapon.
Sa taho gikan sa Provincial Disaster Risk Reduction and Management Council (PDRRMC) sa probinsiya nga kalit lang mibundak ang kusog nga ulan ug nitayhop ang kusog sab nga hangin sa maong dapit.
Wa madugay, kalit lang niulan og ice nga daw kadako sa liso sa kakaw.
Gikuso-kuso sa hangin ang mga tulda-tulda sa mga evacuation sites sa lungsod hinungdan nga nanglupad kini ug gibaha.
Nangatumba ang mga dagkong punoan sa kahoy daplin sa national highway, apil na ang mga poste sa kuryente nga maoy hinungdan sa pagkapawong sa suplay sa dagitab ug pagkakulgot sa biyahero sa kalsada.
Nangabasa ang mga bakwit, apil ang ilang mga personal nga gamit samtang ang uban nila, nabukulan sab tungod sa pag-ulan og ice.
Daling nitunol og tabang ang kagamhanang probinsiyal alang sa mga naapektuhan. (EEF)