SUGOD karong Nobiyembre 15, Biyernes, ipaubos sa tulo ka buwan nga “closed season” o dili una pakuhaan og isda ang Visayan Sea.
Subay niini nanawagan usab ang Bureau of Fisheries and Aquatic Resources in Central Visayas (BFAR) 7 sa nagkadaiyang mga hingtungdan nga aktibo kining motuman sa pagsira una sa pagpangisda sa maong dagat.
Ang pagpanguha sa isda susama sa sardinas, herring, ug mackerel ang gidili sulod sa tulo ka buwan diin hangtod kini Pebrero 15 sunod tuig.
Gitagana ang tulo ka buwan nga dili una pagkuha sa maong mga isda aron mahatagan kini og igong panahon sa pagdaghan ug pagdagko.
Giawhag hinuon ni BFAR 7 Regional Director Alfeo Piloton ang mga opisyal sa lokal ug ang nagkadaiyang komunidad nga duol sa dagat nga motuman niini tungod kay alang raman usab kini sa pagprotehir sa Visayas sea.
lakip sa coastal areas nga nag-atubang sa Visayan Sea ang dakbayan sa Bogo, lungsod sa San Remegio, Daanbantayan ug Medellin.
Ang tibuok isla sa Bantayan diin nalukop ang mga lungsod sa Santa Fe, Bantayan ug Madridejos, anaa kini mismo sa Visayan Sea.
Giila ang Visayan Sea isip usa sa labing dako nga fishing ground sa nasod diin lukop niini ang mga isla sa Cebu ug Negros sa habagatan; Masbate sa amihanan; Panay sa kasadpan; ug Leyte sa sidlakan.
Gipahingusgan sa BFAR 7 ang ilahang information drive karong Nobiyembre sa pagpasabot sa publiko ug sa mga mananagat kabahin sa Fisheries Administrative Order 167-3 – ang balaod nga nagmando sa tinuig nga closed season sa Visayan Sea.
Mag-atubang usab og multa ang molapas sa maong balaod. (HBL)