IPATAWAG sa hepe sa Cebu City Police Office (CCPO) kadtong mga pulis nga nadestino sa Abellana Police Station nga wa makatunga sa imbestigasyon nga gihimo sa Commission on Human Rights (CHR)-7 kalabot sa pagpatay sa mayor sa Clarin, Misamis Occidental nga si David Navarro sa niaging buwan.
Gitumbok mao ang tulo ka pulis nga nag-escort ni mayor Navarro atol sa maong hitabo.
Sigun sa CHR 7 nga nagpadala silag summon sa maong mga pulis apan walay bisan usa kanila nga mipatim-aw sa ilang buhatan lakip na ang hepe sa Abellana nga si Police Major Eduard Sanchez.
Apan matod ni Police Colonel Geovanie Maines, acting City Director sa CCPO nga wala na siya masayod sa gihimo sa CHR kung asa nila gipadala ang suwat alang sa maong mga police.
Ang tulo kasamtangan nga naa karon sa Regional Personnel Holding Admin Unit sa Police Regional Office 7.
“Wala naman kaming information na mag ka-conduct ng (investigation) or kahit letter na sinabihan kami. Naabisohan namin sana at mapadala namin doon,” matod ni Colonel Maines.
Nakapangutana si Colonel Maines kung ila bang gidiretso sa pagpadala sa suwat ngadto sa Abellana Police Station o sa mga address sa ilang panimay.
Nagtuo hinuon si Colonel Maines nga adunay miscommunication tali sa CHR 7 ug sa mga police nga nag-escort sa mayor nga angayan nga korihian sa duha ka habig.
Mahimong ipadala sa maong ahensya ang ilang suwat sa iyang buhatan o kaha didto sa PRO 7 aron matunol kini sa iyang mga personnel sa mga police nga angayang ipaubos sa imbestigasyon.
“We are not hiding anything we are open or whatever, dapat duon sa CHR alamin nila kung saan naka-assign na ngayon yung tao para properly ma-coordinate yung mga sulat nila para makarating sa kanila,”matod ni Maines.
Matod ni Maines nga andam silang ihatag ngadto sa CHR 7 ang mga dokumento aron magamit kini sa imbestigasyon. (AYB)