NAG-TRENDING sa social media ang daw eksena sa salida nga Fast and Furious dihang perteng paspasa ang dagan sa usa ka Isuzu Elf truck ug milusot-lusot sa iyang agianan sa Quezon Boulevard, Davao City kagahapon sa buntag.
Human naalarma ang Traffic Group (TG) sa Davao City Police Office (DCPO) ug ang City Traffic and Transport Management Office (CTTMO), daling nasikop ang suspek nga si Carmelito Pamogas Tabion, 27, residente sa Old Market, Kalamansig, Sultan Kudarat.
Upat ka mga sakyanan ang nasaghiran sa gimaneho sa suspek nga Isuzu Elf truck, dunay plaka numero YDT 457 nga naka-rehistro, ubos sa pangalan ni Dezhun Shi, usa ka Chinese national.
Sumala sa usa ka biktima nga si PCPl Lee Antoine A. Tambe, 33, kinsa pulis nga nadestino sa TG-DCPO nga mga alas 9:30 sa buntag, iyang nakita ang maong trak nga nagsugod og haguros ang dagan sa Leon Garcia Street, Brgy. 27-C.
Sa Boulevard area, gi-flagged down na sa Air Force personnel ang trak human kini nag-ekis ekis og dagan sa Boulevard, apan wala kini mihunong, kinsa mipakusog hinuon sa dagan hinungdan nga nasaghiran niini ang laing upat ka mga sakyanan.
Apan, pag-abot niini sa Bolton Bridge sa Quimpo Boulevard na-korner ang maong sakyanan hinungdan nga gitabangan og posas sa awtoridad ang suspek.
Makita sa video sa social media ang aktuwal nga pagposas sa suspek kinsa nagmagahi pa gayod kini sa paggawas sa drivers' seat sa Elf truck, apan pipila ka minuto, naposasan kini.
Human sa insidente usa ka Shuijin Hong ang miangkon sa Elf truck kinsa nagbutyag nga gi-parking ang maong sakyanan sa pantalan sa Sta. Ana gumikan dunay produkto nga ikarga, dihang kalit misulod sa drivers' seat ang suspek ug gimaneho kini padung sa Quezon Boulevard.
Migula ang hungihong gikan sa mga kabanay nga nalisoan sa maayong pangisip ang suspek hinungdan nga nag-amok kini.
Sa pagsuwat ning balita, ang suspek temporaryo nga gikustodiya sa San Pedro Police Station.
Kung mapamatud-an nga anaa kini sa maayong pangisip atol sa hitabo, kasohan kini sa kalapasan sa Republic Act (R.A) 10883 kun New Anti-Carnapping Law ug ang Direct Assault and Damage to Properties.