Akademiko tagaan og unang pagtagad: Gwen
GIAWHAG karon ni Cebu Governor Gwendolyn Garcia ang Department of Education (DepEd) nga mas hatagan og prayoridad ang academic excellence sa mga tinun-an kaysa skills-based activities.
Kini human mipadayag si DepEd Province Schools Division Superintendent Marilyn Andales sa naghinangat na nga kompetisyon sa mga tinun-an nga gitawag og Technolympics nga ipahigayon sa Isla sa Bantayan sa unang semana sa Disyembre ning tuiga.
May 1,600 na ka mga tinun-an ang nalista sa DepEd nga maoy ipada sa maong kompetisyon.
Ubos sa nahisgutang indigay gikinahanglan nga ipakita sa mga tinun-an ang kahanas niini sama sa pagpanday ug cabinet, dressmaking, food carving, gardening, card making ug uban pa.
Gipasabot ni Andales nga ang maong kompetisyon sama sa subject nga nalakip sa curriculum sa mga tinun-an sa elementarya ubos sa Technology and Livelihood Education (TLE).
Atol sa pulong niadtong Lunes, Nobyembre 11, 2019 gikwestyon ni Garcia kon gikinahanglan ba gyud nga tambungan sa mga tinun-an ang maong kalihukan diin mabiyaan usab sa magtutudlo ang klase niini.
Pipila usab sa mga Mayor sama ni Borbon Mayor, Noelle Dotillos ang wa mouyon sa maong plano tungod sa ka risgo pagtabok sa laing isla ug sa kahadlok niini sa nahitabong insidente sa lungsod sa Boljoon nga mikalas og kinabuhi sa mga tinun-an.
“Dako na ang problema ana kay ang mga bata karon dili na gani nato pasakyon ug de karga kay madisgrasya unya karon layat pa labang pa ug lawud unya karon ang panahon sigi lang ug bawd ang ma-blame ana, local chief executives,” matod ni Mayor Noel Dotillos sa lungsod sa Borbon.
Matod ni Garcia nga nakadawat siya ug taho nga ubos ug grado ang mga tinun-an sa National Achievement Test (NAT) hinungdan nga inay mag focus sa mga skills-based activities mas maayo pa nga mas hatagan ug daghang oras ang academics.
“I wish that DepEd will now focus on the academic performance of our students because we are not envisioning that our students will someday be making dish gardens or be carpenters. We would like to see them excelling in academics because after all that is really the measure of excellence, not to disparage that those who would rather go into skills. Di man gyud parehas ang tanan. Let us give our students the chance or the challenge to excel academically.”
Dugang niya nga kon man gani maghisgot og skills-based programs anaa man ang Technical Education and Skills Development Authority (Tesda) nga mahimong madangpan sa mga tinun-an kon buot gyud niini nga vocational ang kuhaon sa mga tiun-an.
“I think, Tesda is the proper agency for that and they have scholarships for that. Furthermore, kon i-apil pa nimo ang elementary students nga dili pa man na sila mag decide og mag vocational ba. No wonder it was pointed out in that meeting nga mubo kaayo atong score sa National Achievement Test. Could it be perhaps apil na niini ang mga techno wa pay labot sa mga sports. Kalimot na ta nga ang edukasyon ang pinaka importante unta,” matod ni Garcia.
Tungod niini, si Andales nagkanayon nga isugyot niya ang concerns sa local chief executives sa mga kadagkuan sa DepEd aron masolusyonan ang problema sanglit nagkaduol na usab ang maong kalihukan. (ANV)