GIKLARO ni Mayor Edgardo Labella nga walay labaw sa Cebu City Sinulog Governing Board (CCSGB) ug Sinulog Foundation Inc. (SFI) kon hisgutan ang ilang mga kaakohan, obligasyon ug gahom para sa umaabot nga Sinulog 2020.
Si Labella kinsa maoy chairman sa CCSGB, nibutyag nga prayoridad nila ang peace and order, disaster preparedness, traffic management, security ug uban pang kalihukan para sa kalampusan sa labing dako, grandiyuso, relihiyuso ug kulturanhong kalihukan para sa Sinulog.
“Remember the role of the Sinulog Foundation Inc. and Sinulog Board are complimentary. They compliment each other with one purpose, one ultimate objective--to make our Sinulog a success,” padayag ni Labella.
Ang mayor nibuhi sa maong pamahayag human nianunsyo si CCSGB executive director Barney Borja nga nakaandam na ang mga kalihukan para sa Sinulog 2020 ug wala na kini magkinahanglan og pagtugot sa SFI. Ang SFI ang organizer sa Sinulog sulod na sa 35 ka tuig nga nakalabay.
“No one is above or under the other. We have one ultimate objective and that is the success of the Sinulog 2020,” dugang ni Labella kinsa niingon nga wala pa niya mahinabi silang Borja ug kaubanan.
Gipadayag sa mayor nga kon unsay nasabotan sa SFI, tahuron kini sa CCSGB sanglit matag meeting nila anaa ang mga SFI board of trustee nga gipangulohan ni Pericles Dakay.
Niadtong Agusto, ang mayor nipagawas og executive order pagmugna sa CCSGB para maoy motutok sa mga problema nga nahisgutan sa ibabaw ug ang pag-organize, pag-solicit og mga sponsor ug ubang kalihukan may labot sa Sinulog gitugyan kini ngadto sa SFI.
Apan bisan pa sa maong order, si Bise Mayor Michael Rama, kinsa maoy chairman sa SFI sulod sa 14 ka tuig, nikanaog sa iyang posisyon. Nagpabilin kini nga sakop sa board ug nisaad nga motabang sa preparasyon sa Sinulog subay sa iyang kapasidad isip bise mayor.
Ang SFI sa ilang press release, nibakante sa posisyon sa chairman human ni-epekto ang resignasyon ni Rama. Kini isip ilang pagrespeto sa kanhi mayor.
Apan ilang gitudlo isip acting chairman si Dakay kinsa maoy presidente sa SFI sulod na usab sa dugay nga panahon.
Si Val Sandiego, ang project director sa CCSGB, niingon nga wala silay gitangtang nga activity sa Sinulog inay aduna silay gipuno sama sa Sinulog sa Palaboy, vlogging contest, Sinulog Market street fair ug drum and bugle contingent.
Gipadayag usab ni Sandiego nga mabalik na usab ang street party apan niining higayona, estrikto kini nilang ipatuman uban sa hugot nga siguridad para luwas ug hapsay gihapon ang kasaulogan. (PAC)