NIPASAKA og sumbong sa Ombudsman Visayas ang konsehal sa lungsod sa Santa Fe batok kang Mayor Ithamar Espinosa.
Mga sumbong nga harassment, workplace bullying, unjust vexation ug grave abuse of authority ang gipasaka ni Councilor Joan Nepangue batok kang Espinosa.
Ang sumbong gihulagway sa mayor nga “politically motivated.”
Ang kiha ni Nepangue, nga gisuwat sa tulo ka pahina,nagsaysay unsay gihimo ni Espinosa kaniya ug sa iyang trabahante sa dihang nabiktima kini sa hit and run.
Septiyembre 19, 2019 sa alas 9 sa gabii, ang iyang waiter sa beach resort nga si Ronald Autencio niduol kaniya samtang sila nangaon kauban sa iyang higala.
Si Autencio nipahibawo nga siya gitawgan sa iyang live-in partner nga si Marivic Ariesgado nga kanhi usab niya front desk uban sa ilang anak nga sila nadisgrasya samtang sakay sa usa ka motorsiklo.
Apan ang giingong nakabangga kanila nibiya ra human sila mabanggai.
Ang mga kuyamoy sa tiil ni Ariesgado naputol tungod sa kakusog sa impact.
Dali sila nga niadto sa Bantayan Hospital diin gidala ang mga biktima uban sa iyang mga trabahante sa resort.
Matod ni Nepangue nga gitug-anan siya ni Ariesgado nga ang nakabangga kanila ang sakyanan nga gimaneho sa pag-umangkon sa mayor nga si Raprap Zaspa.
Si Raprap anak usab sa kapitan sa Barangay Pooc, Rafaelita Espinosa Zaspa.
Human sa duha ka mga oras nga pagpangita, nakit-an si Zaspa sa kapulisan sa lungsod sa Sante Fe ug nisulti nga moapas siya sa police station.
Sa sulod sa police station sa Bantayan, nagkaabot sila si Autencio ug Zaspa.
Niapas usab si Nepangue apan, matod niya, nga ang iyang pag-adto tungod kay iya kining empleyado.
Samtang nagpadayon ang kapulisan sa imbestigasyon, giingong niabot si Espinosa sakay sa iyang sports utility vehicle uban sa iyang mga body guard.
Nisunod usab sa pag-abot si Kapitana Rafaela ug dinhi giingong nagsugod nga nagyawyaw ngadto kang Autencio.
“Mga yawa kamo! Nganong inyo gi detain ako anak?!” kutlo ni Nepangue sa sulti ni Rafaela nga nalatid sa complaint affidavit sa konsehal.
Giingong gikwestyon usab sa kapitan ang mga pulis nganong gibalhog sa bilanggoan ang iyang anak nga unta wala may namatay samtang wala dakpa ang driver sa motor nga wa pay lisensya.
Sa ilang pagpamauli nakabantay sila sa sakyanan sa mayor nga nagsunod kanila nga kusog nga nakapadagan.
Giingong aduna kini sakay nga mga tawo nga matod pa dili taga lungsod sa Santa Fe nga nakapahadlok nila og maayo.
Tungod sa kahadlok, nisubay silag lain nga dalan.
Niadtong Oktobre 9 nagpatawag og tigom si Vice Mayor Naomi Espinosa sa Seafood Plaza uban kang Mayor Espinosa.
Gitambungan kini sa mga konsehal sa lungsod, presidente sa Sangguaniang Kabataan, Association of Barangay Council president, Sangguniang Bayan secretary ug duha ka mga municipal administrator.
“Nagdumot ang ako family nimo kay imo gipapriso ang akong pag-umangkon,” kutlo ni Nepangue sa giingong gisulti sa mayor ngadto kaniya.
Tungod sa hitabo, nahadlok na sa iyang siguridad si Nepangue.
“Politically motivated” paghulagway ni Mayor Ithamar Espinosa sa gipasakang reklamo ni Nepangue batok kaniya sa Office of the Ombudsman-Visayas.
“Klaro kaayo nga political. Nasuko pa tingali siya kabahin atong resulta sa 2016 elections,” sulti ni Espinosa sa SunStar Cebu sa usa ka phone interview, Martes, Nobiyembre 12, 2019.
Sila si Espinosa ug Nepangue nag-atbang sa May 2016 elections alang sa pagka bise mayor.
Si Espinosa nipilde kang Nepangue og 1,404 votes.
Human mapakyas, si Nepangue nidagan sa Mayo 13, 2019 elections sa pagka konsehal sa lungsod. Siya ang nakakuha sa labing taas nga botos nga 9,585 mao nga nahimong konsehal sa lungsod.
Nagduda si Espinosa nga ang kiha batok kaniya pagbulingbuling sa iyang kridibilidad isip public official.
“Wa man koy nabuhat nga dautan,” dugang ni Espinosa.
Matod ni Espinosa nga siya pa ang nipadala og ambulansya sa dapit human makadawat og report labot sa aksidente sa dan.
Si Espinosa niingon nga ang iyang pamilya nag-andam og mga dokumento aron pagkiha kang Nepangue ug sa iyang staff bisan wa pa mapasaka ang sumbong batok kaniya.
“Wala pud lagi dayon mi naka-file kay kani pud laging huna-huna nato ba nga taga ato ra, higala pa gyud atong pamilya. Nanghinaot pa unta ta nga maistoryahan ug magkasinabot lang ang mga partido,” matod ni Espinosa.