SUPERBALITA CEBU

Pista sa Lapu-Lapu ‘gipulitika’

MGA kalihokan alang sa kapistahan sa Dakbayan sa Lapu-Lapu giingong gisabotahe sa mga barangay kapitan sa oposisyon.

Gibutyag ni Lapu-Lapu City Mayor Junard Chan ang matod pa pakyas ang pipila sa mga kapitan sa pagtuman sa tradisyon diin sa matag fluvial procession sa imahen sa Birhen sa Regla, ang Association of Barangay Councils (ABC) ubos sa pamunoan ni Konsehal Eduardo Cuizon, maoy tahasan alang sa floral drop diha sa duha ka mga taytayan.

Giingong gibalibaran sa ABC president nga mohimo sa maong pagpangandam.

Atol sa seaborne procession kagahapon sayo sa buntag, Nobiyembre 12, diin misubay kini sa Mactan channel, menos ang mga buwak nga gisabwag atol sa pag-agi sa ferryboat sa Topline Express nga maoy giluwanan sa imahen.

Nagkanayon si Chan nga kanhi barangay kapitan nga sa naandan, silang 19 ka mga barangay sa mainland ang tugyanan sa ABC nga moandam og mga buwak nga gamiton isip halad.

Nganong kami?

Apan si ABC president ug Bankal barangay captain Cuizon, sa iyang bahin, nipasabot nga di bugtong ang ABC maoy mohimo sa pagpangandam kay igo lang silang mo-cooperate o support.

“Wa intawn koy staff oy. Unsaon man namo pagpreparar? Usa ra nang akong staff, tig-abli ug sira sa pultahan ug mo-receive og dokomento. Usahay akong sugu-on,” pasabot ni Cuizon sa dihang nahinabi sa telepono sa Superbalita Cebu.

Gikuwestiyon ni Cuizon ang mayor sa pagpahid sa bulilyaso diha kaniya.

“Amahan gani ka sa usa ka pamilya, dili nimo i-blame ang palpak ngadto sa imong anak. Ang ginikanan gyud na, kon gi-unsa nimo pagtratar imong anak ,” matod pa ni Cuizon.

Laing pasangil sa mayor nga gimanduan ni Cuizon ang mga barangay kapitan nga dili motunga sa ABC Night kagabii, Nobiyembre 12, base sa iyang nadawat nga inpormasyon gikan sa ubang mga kapitan.

Wa usab mohimo og preparasyon ang ABC sa ilang tinuig nga ‘night activity’ alang sa fiesta.

“Di unta ilabot ang kapistahan sa Birhen sa Regla sa pulitika. Unsa man ni si Eddie (Cuizon), wa pa ka move-on sa politika?,” kuwestiyon ni Chan atol sa press conference.

Giklaro ni Cuizon nga wa siya modiktar sa mga kapitan nga nagpugong sa pagsalmot.

Nasabutan sa mga barangay opisyal atol sa katapusang ABC meeting nga way ABC night nga ipahigayon.

Aron madayon

Adunay Plan B nga gipatuman ang mayor aron lang nga mahinayon ang ABC night.

Ang iyang buhatan mi-andam og 30 ka lechon aron ikadalit sa 30 ka barangay lakip na ang puso, imnonon ingon man ang pagmontar og sound system.

Atubangan sa mga tigbalita kagahapon, gipangtawgan sa mayor ang pipila sa mga kapitan pinaagi sa mobile phone, ilabi na niadtong ilado nga supporter sa mga Radaza nga naghangyo nga motunga sa ABC night.

Sagad sa mga kapitan misanong sa imbetasyon sa mayor, ang uban misanong apan adunay pagduha-duha.

Mga kapitan nga gipangtawgan naglangkob nila ni; Lyndel Bullos – Pajo, Reynaldo Tampus – Canjulao, Cyrus Eyas – San Vicente, Justino Booc Jr. – Pusok, Joselito Tibon – Suba Basbas, Lucrecia Amores – Marigondon, Eleonor Fontanoza – Gun ob, Crisanto Estardo – Punta Engaño, Evaristo Dihayco – Mactan ug Virgilio Casiao – Pangan-an (Olango Island).

“Ako lang tan-awon mayor kay mag-session pud ra ba mi (barangay council),” pamahayag ni Amores.

“Ayaw na tan-awa, moadto gyud ta. I-postpone lang usa nang session. Ka usa ra bitaw ni sa usa ka tuig,” insister ni Chan.

Si Cuizon, sa iyang bahin mipahibawo nga kon siya imbitaron di siya makahigayon kay aduna siyay kalihokan sa ilang kapunongan sa simbahan nga tambungan.

Kagahapon unang adlaw sa nobenaryo nga gisugdan sa seaborne procession nga nanukad sa pribadong resort sa Barangay Suba Basbas ug misubay sa Hilutungan channel lahos sa Punta Engaño ngadto na sa Mactan channel ug midunggo ang ferryboat sa Muelle Osmeña sa Barangay Poblacion.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph