DILI man tuod tantong maayo ang duwa ni Kawhi Leonard apan ang iyang kontribyusyon igo na aron matabangan ang bag-o niyang team nga mao ang host Los Angeles Clippers sa pagbuntog sa iyang kanhi team nga Toronto Raptors, 98-88, kagahapon sa National Basketball Association (NBA).
Si Leonard, kinsa maoy nangulo sa Raptors aron maangkon ang labing unang titulo niini sa miaging tuig, igo lang mirehistro og 12 puntos sa 2-of-11 shooting ug nakamugna kini’g siyam ka turnovers.
Hinuon nakamaneho gihapon ang Clippers pag-angkon sa kadaugan gumikan kay tanan nilang mga magduduwa nga ningpakita og aksyon pulos man nakatampo sa opensa.
Naglisod sab gyud hinuon si Leonard gumikan kay kanunay’ng mopahamtang og double team nga depensa ang Raptors ngadto kaniya.
“As soon as I walked across half-court they tried to get the ball out of my hands,” matod ni Leonard. “They did a great job on me defending and sending an extra body. It got me better and it’s going to get my teammates better.”
Wala man tuod nakasutoy ang opensa sa kasamtangang Finals MVP apan mibawi kini sa laing departamento pinaagi sa pagrehistro og 11 ka rebounds ug siyam ka assists.
Gumikan kay bag-o pa man siyang mibiya sa Raptors aron motapon sa Clippers, wala malikayi ni Leonard nga manumbalik sa iyang panumdoman ang kasinatian niya sa Toronto.
“I had a great time there. It’s the next chapter now. I can’t live in the past,” pasabot ni Leonard. “I’m with a different team and they want to have that same feeling.”
Aron matapakan ang haw-ang sa duwa ni Leonard, si Lou Williams nikayod og maayo ug napangulohan niya ang Clippers pinaagi sa iyang 21 puntos.
Ang reserbang mga magduduwa sa Clippers dako sab og natampo diin ilang gilupig ang ilang mga kaparang sa Raptors, 56-35, sa pinuntosay.
Ang Raptors gipangulohan ni Pascal Siakam pinaagi sa iyang 16 puntos ug 10 rebounds, nidugang og 15 puntos si Norman Powell samtang nihatag og 14 puntos si Fred VanVleet.
Sa laing mga duwa, ningdaog ang Boston Celtics batok Dallas Mavericks, 116-106, Utah Jazz batok Golden State Warriors, 122-108, Houston Rockets batok New Orleans Pelicans, 122-116, Memphis Grizzlies batok San Antonio Spurs, 113-109, ug Minnesota Timberwolves batok Detriot Pistons, 120-114. (AP, ESL)