SUPERBALITA CEBU

Migallen: Hulga sa Cesafi basketball

Taym pa

WOW! Unsa ka tinuod nga tag P120 diay ang pulta sa Cebu Schools Athletic Foundation, Inc. (Cesafi) All Star Games sa Cebu Coliseum niadtong Dominggo.

Wa man gud ko kahigayon pagtan-aw tungod kay duna koy mas importanting gilakaw.

Ingon ani na diay ka mahal ang mga Cesafi basketball. Bisan gani sa mga regular games sa elimination round, kadaghan na ta nakadungog og mga reklamo nga mahal ra ang pulta sa mga duwa.

Pastilan. Kining legaha alang ni sa mga estudiyante ug natural ang market niini anaa ra usab sa sektor sa mga tinun-an.

Unya, puwera lang niadtong pipila ka pugyot nga maka-afford sa pagpulta, pila ra man intawo’y allowance aning mga nagtungha pa.

Mas maayo ipalit na lang nila og pagkaon, masalbar pa ang ilang panihapon.

Mao ni unang rason kon nganong gilangaw ang Cesafi karon. Mas maayo pa ang inter-barangay kay bibo pang tan-awon.

Daghan nang misugyot niini nga pakubsan ang pulta, lakip na ang mga ginikanan sa mga players, pero mora man og nagpakabuta-bungol man lang ang commissioner nga si Felix Tiukinhoy Jr.

Ang UAAP nagbarato man gani sa ilang entrance fee aron lang pag-accomodate sa mga estudiyante.

Kining Cesafi nga kanhi mao ang Cebu Amateur Athletic Association (CAAA)nakaumol na og daghang produkto nga nakaduwa sa PBA.

Nahimo na usab kining hunting ground sa ubang mga dagkong lega.

Mao na nga giila kini siyang legaha nga counterpart sa NCAA ug UAAP didto sa Manila.

Pero og imong itandi ang crowd, ang mga duwa sa UAAP ug NCAA moabot og tag 20,000 kapin o kulang ang linawas nga mosaksi ilabi na og krusyal nga mga duwa samtang ang sa Cesafi maayo lang og moabot og kapin sa 100.

Pila na ka tuig kini naobserbahan apan way aksiyon nga gihimo ang atong mga kadagkuan.

Mga sugyot igo lang yam-iran kay ang ilaha gyud ang matuman.

Kon sa una adunay mga balloon, confettis, streamers ug uban pa nga modayan-dayan inig human sa championship game karon wala na.

Sa niaging pipila na ka season, wala na usay rookie of the year awardee. Atong madungog pulos na negatibong komento sa pagpadagan.

Hinaot nga dili moabot ning akong gikahadlokan, nga kon magpermamenti basin simbako mao na ni mamatyan sa inter-school basketball sa Sugbo.

Something must be done or else...tssk...tssk... (jun.migallen22@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph