NAGDUKA-duka si June nga nagsakay sa trak dekarga nga kargahanan og isda gikan sa Bogo ngadto sa Pasil, dakbayan sa Sugbo. Truck boy siya sa negusyo nga ‘trucking’ sa iyang uyoan nga si Tomas. Naglingkod siya sa kahon sa isda sampig sa walang bungbong sa trak dekarga. Unya nahitagpilaw siya nga naglingkod ug nagsandig sa bungbong sa trak samtang nagdagan kini. Ala una sa kaadlawon dihang nigikan sa Bogo ang trak dekarga.
Unya nakurat ug nalisang si June dihang may mipaka ug dayon natay-og ang sakyanan. Maoy iyang namat-an ug nabatyagan nga di na siya makalihok. Naipit ang iyang mga tiil sa dagkong kahon sa isda. Ug ang trak wa na mag-andar ni magdagan.
“Naunsa man ta, Yong?” sampit ni June sa drayber nga si Yongyong. Way tubag.
“Raul! Rene! Naunsa man ta?” tawag niya sa duha ka laing truck boy nga didto naglingkdod sa front seat. Wa gihapoy tubag. Gikulbaan si June.
Nagsugod nag kabanhod ug pagsakit ang iyang mga tiil nga naipit. Gianinaw niya ang palibot. Nia ang trak tungod sa dakong bilding sa San Miguel Brewery. Naa kini sa daplin sa taytayan habig sa tuo. Nabangga diay ang trak sa barandilyas sa taytayan. Segurado si June nga nahikatulog si Yongyong samtang nagmaneho. Mingaw pa ang kalikupan. “Diyos ko, tabangi mi!” tuaw ni June.
Unya wa damha ni June kalit nga may mitunga nga dakong tawo. Taas siya ug maskulado. Giwaling sa tawo ang mga kahon nga nakaipit kang June. Gialsa niya gikan sa trak ngadto sa daplin sa karsada. Gitabang sab sa tawo sila si Yongyong, Raul ug Rene. Unya miabot ang ambulansiya sa ERUF. Gikarga silang upat ug gidala sa ospital.
Nalimtan na lang ni June ang tawo nga mitabang kanila. Maayo gani kay bun-og ra ang ilang nahiaguman. Way bukog nga nangabali. Tulo ka adlaw sila didto sa ospital.
Paghiuli nila sa Bogo nakigsulti si Tomas nilang June.
“Kinsa may nitabang ninyo?” ni Tomas ngadto kang June.
“Wa man ko kaila, Tiyo, pero dako siyang tawo ug maskulado,” ni June. Unya nasabak sa iyang panan-aw kadtong karaang hulagway nga kinuwadro nga gibitay sa bungbong sa sala sa balay sa iyang uyoan. “Ug, Tiyo, amgid-amgid siya anang naa sa hulagway.” Gitudlo ni June ang larawan nga gikuwadro.
“Uy! Si anhing Lolo Filemon man na ninyo! Igsuon ni anhing Papa Daniel. Wa mo makaabot ana niya,” tug-an ni Tomas kang June.
“Tinuod gyud diay, Tiyo, nga duna tay anghel nga magbalantay!” tuaw ni June.
“Motuo sab ko ana, kay duna gyud tay kadugo nga patay na, unya sangunan sa Diyos nga magbantay nato,” ni Tomas. “Tarong ug relihiyusong tawo kadto si Lolo Filemon ninyo!” (Katapusan)