HANGTOD karon maorag di pa gihapon makatuo ang Cebuanang si Aida Patana nga siya ang nidaug nga Mrs. Philippines World 2019 first runner-up sa Paris, France niadtong Oktubre 26.
Siya usab ang nihakot sa special awards nga “Mrs. Congeniality”, “Best in National Costume”, “Best Advocacy Video” ug “People’s Choice Award.”
Samot pa dihang gianunsyo sa Mrs. World Organization nga dili lang ang titleholder kundi lakip siya, ang mo-representar sa Pilipinas sa Mrs. World 2020 nga ipahigayon sa Las Vegas, Nevada, USA karong Dec. 6.
Ang 46-anyos nga single mom ang modala sa titulong “Mrs. Visayan Island World.”
Una ning higayon nga duha sa Pilipinas ang ipada sa Mrs. World, ang prestihiyusong pageant sa mga minyo diin mas gihatagan og gibug-aton ang “inner beauty” nga namugna niadtong 1984.
Gawas sa iyang talent agency, si Aida Patana naila sa iyang adbokasiya ug malumo niyang kasingkasing sa mga kabus.
Dili usab ikabaylo ang iyang mga sakripisyo ug pag-antos aron lang mapadako ang iyang lima ka mga anak nga giisip niyang bugtong bahandi ug inspirasyon sa kinabuhi.
Dili lang makigtigi batok sa 55 ka mga nasud sa Las Vegas apan si Patana mao usab karon ang gitudlong associate director sa Mrs. World Organization diin sugod sunod tuig siya na ang modala sa Mrs. Philippines World.
“She may speak nonsense sometimes but she’s a very hardworking woman,” matod pa sa iyang giisip nga mentor ug amahan nga si Senyorito Michel Lhuillier atol sa thanksgiving ug send-off party ug birthday celebration niya niadtong Dominggo.
Aida Patana, Ssssuper Ka!
Giunsa nimo pag-apil sa Mrs. Philippines World?
Actually, nakit-an ra ko nila sa Facebook. Active man ko even sa una pa sa mga charity work. Then silang Nyorito Michel ug actor Daniel Matsunaga mao gyuy ni-push nako nga moapil. Kaming duha ni Mrs. Hawaii handpicked ra mi tungod sa among adbokasiya.
Grabe man daw ka’g entourage pag-adto sa Paris?
Sila Daniel ug ang iyang uyab. Si Jonas Borces (make-up artist), Erwin Tizon (make-up artist), Junjet Primor (choreographer)... basta daghan mga taga-Cebu. Daghan man kaayong ni-sponsor. Pasalamat ko sa mga taga-Cebu kay wa ko nila pasagdi.
Pila sad ka ka-adlaw sa Paris?
Nine days pero gamay ra kog nasuroy kay mabuang ko 8 a.m. to 12 midnight ang among training. Actually, I almost quit kay nakahilak gyud ko kay kasuk-an pa ka. Grabe ang Q and A lisud kaayo ang mga question.
Unsa may question nimo sa actual pageant?
Ang gi-ask sa ako: “Is it true that women are more efficient than men in conflict prevention and why?” So akong answer: “No. I believe both. All genders have the power. I, thank you.” Daghan kaayong namakpak nako. Gitambagan man kong Junjet nga ayaw tas-a imong tubag. Direct to the point aron di ka mag-blackout. Grabe akong ampo nga di ko mangurog. Nagbutang pa gani kog sinsiyo sa akong sandal kay pasuwerte. Usa sa nakatabang nako si Daniel Matsunaga nga naa sa atubangan sa stage sigeg ingon: “Go Aida! Go Aida!”
Unsa man tong controversy ninyo ni Mrs. Hawaii?
Pag-gown competition sige siyag pangutana nako unsa kunoy akong gisuksok sa akong boobs. Sige siyag harass nako. Iya gyung ana-on. Naglagot nako mao nidagan ko sa backstage aron magpatabang sa mga taga-Cebu. Nidagan sad siya iya kong gigukod kay unsa kuno lagi akong gisuksok. Ako siyang giingnan: “Wa kay labot. It’s personal.” Pagkadaug niya ako siyang giingnan: “Once you’re a beauty queen, you should also be beautiful inside.” Kay si Mrs. Vietnam nga nidaug last year mao may nag-training namo. Ingon siya: “Mrs. World is really all about inner beauty.”