NAAY panultion nga nag-ingon nga aron kuno dili ka malimtan ining kalibotana, you should sire a son, plant a tree or write a book. (Akong giiningles kay mao nay pirmi nakong mabasahan.)
Aron kuno mahimo kang imortal -- kanang nakatatak na imong pangalan sa kasaysayan o sa panumdoman sa mga tawo -- kinahanglang buhaton nimo bisag usa lang ining tulo: makaanak kag lalaki, magtanom kag kahoy o magsuwat kag libro.
Nakapahinuklog ni nako nga panultion sa unang higayon nga nakabasa ko ini. Nakaingon ko, bitaw no? Kon manganak kag lalaki, magpadayon ang imong dugo ug ang imong apelyido kay saw-on man kini sa bata. Ug kon kining bataa makaanak pa gyod og lalaki, ug magpadayon nga puro lalaki ang mosunod sa moabot nga mga henerasyon, ug mahimo kang imortal.
Di pa uso ang feminism kaniadto, mao nga pasayloa nga mao ni akong pagsabot.
Kining pagtanom og kahoy may punto sab. Nag elementarya ko sa panahon nga unang nauso ang tree planting program sa gobiyerno. Matag tuig mananom mig kahoy, tagsa matag estudyante. Ug kinahanglang atimanon ni namo. Bisitahon ug bisbisan matag adlaw bisag bakasyon kay matod pa ni mam ug sir, mag-una pa kuno mig kamatay sa among kahoy, ug pinaagi niini, mahimo ming imortal.
Pagsuwat og libro. Kini ang labing nakakubit sa akong hunahuna kaniadto. Hilig ko mobasa. Nagtubo ko sa usa ka balay nga puno sa mga magasin, mga libro, ug bisan unsa na lang nga basahon--gikan sa komiks ngadto’s kinabuhi sa mga santo.
Pag-graduate nakog elementarya, nalimtan na nako ang akong mga kahoy kay wa na man si mam ug si sir. Gikaon na tingali tong mga kahoya sa latagaw nga mga kanding ug baka. Ug ambot ngano nga pag college nako, nasud man sa akong utok nga di ko magminyo. Mamatay ko nga ulitawong guwang. Kamoy lang uroy panganak diha.
Apan ang pangandoy nga maghimog libro nagpadayon hangtod karon. Ambot naa ba kahay mobasa nako, bahala na. Basta sa akong hunahuna, imortal ko.
•••
Ang akong libro nga “Ang Batang Scorpion,” koleksyon sa akong mga Superbalita kolum, mapalit karong semanaha sa Parkmall, sa main entrance, hangtod Nobiyembre 17. Mapalit sab kini sa Music Lab, tupad sa Handuraw Mango Square.