PORBIDA no, gi-terminate na sila apan nagpa-ugat na lang gihapon ug unya nangiha pa ug nangayo pa og danyos. Ang tulo ka mga sakop sa board of directors sa Metropolitan Cebu Water District (MCWD) misang-at og kaso batok kang Mayor Edgardo Labella ug sa acting administrator sa Local Water Utilities Administration (LWUA) Jeci Lapus ug sa tulo ka mga LWUA officials nga gitudlo isip interim board sa MCWD.
Sila si MCWD board members Agustus Pe Jr., Ralph Sevilla ug Cecile Adlawan misang-at og petisyon sa hukmanan gumikan sa pagtangtang kanila. Ang tulo pulos tinudlo ni kanhi mayor Tomas Osmena. Samtang si kanhi konsihal Coping Fernandez nga tinudlo ni kanhi Mayor Mike Rama, wala moapil sa asunto. Una nang ni-demiter si MCWD board chairman Joel Marie Yu.
Mihangyo sila si Pe, Sevilla ug Adlawan sa korte nga i-deklarar nga illegal ang termination order nga giisyo ni Labella kanila gumikan kay wala niini sunda ang “due process” ug wala kini masubay sa balaod. Gusto nilang ibalik ang status quo ug nangayo pa sila og danyos nga usa ka milyon ka pesos.
Pagkabaga ba nila og nawong. Mora man sila og tuko nga mikapyot o mokapit gyud sa bongbong. Base sa balaod sa Presidential Decree No. 198, ang mayor sa local government unit nga maoy pinakadaghan ogcustomers maoy motudlo sa mga sakop sa board. Sa kaso sa MCWD, ang mayor sa dakbayan sa Sugbo.
Ug kay siya man ang adunay katungod nga motudlo, aduna pod siyay katungod nga motangtang kanila basta adunay igong basihanan ug sukaranan. Sa iningles pa “with a cause”. Daghang nangreklamo batok sa MCWD kay wala kini makahatag og insaktong serbisyo sa customers niini. Kon duna ni silay kauwaw, angay na kini silang mamahawa. (bobbygnalzaro@gmail.com)