PADAYON sa pagpanawagan ang kapulisan human pabilin nga missing ang usa ka dalaga nga taga Barangay Tankulan, lungsod sa Manolo Fortich, Bukidnon.
Giila ang biktima nga mao si Shiela Mae B. Nadela, 19, usa ka Grade 11 nga estudyante, taga Zone 2, Barangay Lingion, Manolo Fortich, Bukidnon.
Si Police Sergeant Christian Dale Carlos sa Manolo Police Station nisulti sa SunStar Superbalita nga magpatabang na ang igsoun sa biktima human adlawng Sabado pa kini nawala.
Tungod niini, ilang giadtoan ang hinigugma sa biktima apan wala sa dapit ang biktima.
Lakip sa giadtoan sa kapolisan ang posibleng mga lugar nga maadtoan niini lakip mga kaparyentihan apan wala gihapon kini.
Karon tuiga nakaundang kini og skwela kay bout niining mo-transfer og laing skwelahan.
Matud ni Carlos, malaumon silang wala’y dautan mahitabo niini ug makabalik sa dili madugay.
“Naay same niya ug kaso. Maayo to kay nakauli kay igo lang naka-date-date sa CdeO,” matud ni Carlos.
Kung dunay nakakita ug nasayod sa iyang nahimutangan, pahibaloa ang iyang igsuon nga labihan na ang kabalaka nga gibati ug ingon man ang kapolisan sa Manolo Fortich Police Station.
Itawag sa numero 0927-680-2115 ug 0997-194-3608.