NAGUBOT ang mga tawo sa palibot nga nag-ilogay sa kwarta nga gisabwag sa gituohang tulisan aron makasibat gikan sa mga pulis human giingong nanulis sa usa ka hardware sa dalan Ipil, Barangay Carmen, dakbayan sa Cagayan de Oro.
Apan, wala naka-ikyas si Archolito Palubon, alyas Bingkol, residente sa Barangay Bayabas ning dakbayan, ug napusilan patay atol sa ginukdanay.
Si Bingkol usa ka taxi driver ug lumad sa Ozamiz City kinsa gitumbok nga lider sa robbery group.
Mga alas 6:15 sa gabii niadtong Martes, Nobiyembre 12, gitulis sa grupo ni Bingkol ang Columbia Hardware nga gisulayan pa og hostage ang tindera.
Gibutyag sa City Director Police Colonel Henry Dampal nga daling nakaresponde ang mga otoridad rason nga nasundan kining suspek kinsa nakigpinusilay sa kapulisan nga niresulta sa kamatayon niini.
“Sa dihang nanulis sa hardware ug mga few minutes nakaresponde man sila atong kapulisan gisundan gyud ni sila. Gani, nabulag mani sila. It’s good nga ang uban nato kapulisan nakatutok so wala gyud siya mabiyae. Dunay encounter nga nahitabo nga niresulta pud sa iyang hinanaling kamatayon,” matud ni Dampal.
“Mahulog nga siya ang lider ani kay kung naa siya’y mga activities kini man siya nanguna,” dugang pa.
Samtang gibutyag sa Scene of the Crime Operatives-Northern Mindanao pinaagi ni Dr. Christian Caballes nga nakaangkon og usa ka samad pinusilan sa lawas si Bingkol.
Narekober gikan kang Bingkol ang kalibre .45 nga puno og bala, lakip na gituohang shabu nga giipit sa P20 ug cash nga anaa sa iyang pitaka.
Nakuha usab sa kapulisan ang motorsiklo nga gituohang getaway vehicle sa mga suspek.
Gikumpirma ni Dampal nga organisado ang grupo ni Bingkol ug taud-taud na kining gisundan sa mga otoridad tungod kay nahimo kining problema sa dakbayan sa Cagayan de Oro.
“Daghan napud ni iyang cases sauna sa LBC. Usa gihapon ni siya, Quality Appliance positive, base sa atong CCTV nakuha, organize group. At least finally nakuha nato,” matud ni Dampal.
Nagmapasalamton usab kini tungod kay paspas nga nakaresponde ang mga otoridad nga anaa ra usab sa likod nga bahin sa patigayon kung asa gitulis.
“Kung dili pa lang sa timely response dili pud nato ni makuha ni nga suspetsado. Sa dugay nga panahon, ato man ning gisunod-sunod sa atong mga operation. Mapasalamaton kaayo ta karon at least finally,” dugang pa.
Gibutyag usab ni Dampal nga nakibhangan ang maong grupo sa kamatayon ning suspetsado ug pagpakita lang usab kini nga andam ang mga otoridad sa paghatag og seguridad sa katawhan sa dakbayan.
“Unang-una, siguro definitely maka demoralize ni sa ilang grupo. At least makita pud nila nga ang atong kapulisan andam motagana ug mohatag sa igo nga seguridad,” dugang pa.
Kahinumduman nga niadtong Nobyimbre 5 tuig 2018 nasikop si Roosevelt Bedro, 37, taga Zone-1, Buara, Bayabas nga usa ka dispatser ug kauban ni Bingkol human nanulis sa LBC sa Divisoria lakip na ang LBC Max Zuniel Carmen, CDOC Branch, LBC Yacapin, LBC Puerto ug Tagoloan.
Nakaikyas niadto si Bingkol human nanglabay og granada.