DAKO og suliran ang Metro Cebu sa kahimtang sa trapiko. Wa pay kahayag nga makita sa kasulbaran ani nga problema. Nagkadaghan pang mga sakyanan sa dan, nanaghan usab ang mga gago nga nagmaneho.
Usa sa mga makabara karon sa trapiko mao ang gagmay nga mga aksidente, sama sa panagbag-id ug panagbangga sa duha ka mga sakyanan nga nisangko sa gamay lang nga damage to property. Mao ni ang kasagaran makabara sa trapiko.
Duna man guy mga bangga nga gamay rang mga danyos sa mga sakyanan apan, ang mga agrabyadong hingtungdan di gustong sabotsabuton lang, huwaton pa ang mga awtoridad aron maoy mosusi sa kahimtang sa mga sakyanan nga nalambigit.
Maayo ra bag moabot gilayon ang mga enforcer o traffic police aron mosuta kinsa ang sad-an sa duha. Bisan sa pagsusi, molanat pag daghang minutos nga makapasamot sa kalangay.
Samtang nagpaabot nga matan-aw sa traffic personnel ang mga sakyanan, daghan na ang nangatanggong sa karsada.
Maayo ang ordinansahon ni Provincial Board Member Glen Soco nga magmando sa mga tag-iya og sakyanan sa pagkuha og video ug picture sa kahimtang sa binag-iray o bangga aron basehan sa pagdeterminar kinsa ang sad-an.
Okay ra ni nga paagiha apan, duna pay mas maayong paagi nga seguradong di makahasol. Dinhi gamit kaayo ang maayo og klase nga circuit television (CCTV) video nga makakuha og footage sa dan. Kini ang labing maayo nga basehanan sa imbestigasyon. Sa mga modernong nasod sa abroad, dako kaayo kini og gikatabang sa imbestigasyon.
Pinaagi niini, dali rang maibot ang mga sakyanan nga naaksidente nga makapaluag dayon sa trapiko. Gawas nga magamit pa kini sa pag-monitor sa trapiko, makatabang pa sa pagsulbad sa krimen. Gawas sa ordinansahon ni Soco, mopalit na usab unta ang mga opisyal og mga CCTV nga imontar sa tanang mga dan kay dako kaayo kini og gamit sa daghang katuyoan.