GIPASAKA na ang kasong game-fixing sa Maharlika Pilipinas Basketball League (MPBL) ngadto sa Department Of Justice batok sa 21 ka mga tawo lakip na ang tag-iya sa Soccsksargen Marlins nga si Kevin Espinosa ug ubang players niini.
Nalakip usab sa maong kaso ang team officials ug tulo ka Chinese nationals.
Si MPBL commissioner Kenneth Duremdes, pinaagi sa National Bureau of Investigation (NBI), mipasaka og 17 ka ihap sa kasong sugal, multiple counts of game-fixing ug points shaving, sigon sa nalatid sa Pesidential Decree No. 483.
Ang mga Soccsksargen players nga mag-atubang usab sa susamang kaso mao sila si Jake Diwa, Exequiel Biteng, Jerome Juanico, Matthew Bernabe, Julio Magbanua Jr., Abraham Santos, John Patrick Rabe, Ryan Regalado ug Ricky Morillo.
Samtang ang mga Chinese nationals nga nalambigit usab giila nga sila si Mr. Sung, Kein, Emma ug Sonny Uy, Serafin Matias, EJ Avila, Nino Dionisio, Ferdinand Melocoton, Nice Ilagan, Janus Lozada ug Joshua Alcober.
Ang imbestigasyon sa NBA nagpakita nga ang game-fixing nahitabo niadtong buwan sa Hunyo hangtod na sa Oktubre karong tuiga sa nagkalainlaing lugar sama sa Pasay, Pasig, Navotas, Caloocan, Muntinlupa, Batangas City, Bacoor sa Cavite, Malolos sa Bulacan, Angeles sa Pampanga ug Bacolod City.
Si Allein Rey Delfin sa NBA mitug-an nga aduna silay 11 ka mga saksi nga mopamatuod niini, apan wala nila kini gibutyag. (JBM)